《我老婆唔係我女朋友》【那些年／九十年代學界／真人】 第七章全新中篇！: 【第七章】 林心穎密碼（４）
在四周召回班細路聚在一起，勿要落單後，跟手走去搶了細輝本《風雲》來睇，條𡃁仔好鍾意將公仔書對摺成長形一條，攝喺褲後袋，隨時就俾我搶到。隨意踎在班細路側邊，望吓封面——141期《葬心》，我打個突，啋～你鹵味大吉利是，我家阿心不知幾健康！
其實自從「死戰系列」後都無乜再睇《風雲》了，揭吓內頁，呸～門小你步驚雲失完憶又復原？有仔有女有老婆？馬Sir，你都係返去炒樓吧啦，講真要畀錢買就寧可唔睇了，睇吓《龍虎門》期期打到爆晒缸爽好多啦。
正在快揭之際，妹豬氣急敗壞的走過來求救。「仁呱瓜快啲過去救命呀。」
「嗄～妳次次都吼我睇公仔書時先嚟搞我㗎喎。」想靜靜地享受一下開工前的最後自閉都唔得。
「唔係呀，攣毛俾人搞呀。」妹豬焦急的解釋著。
「吓？！」我心諗唔係嘛，好嘅唔靈醜嘅靈？警惕的望向攣毛那方向。
在深水埗街頭打滾，好容易會遇上幾類人，本環陀地雖然講嘢大聲啲，但經濟環境好時，班爛鬼反而有禮貌講道理，成日經過都來𢯎水吹，要食四方飯嘛，而且大部份本身就是邨二代、三代，隨時在公園出入的，都是他們的世叔伯、外婆嫲嫲，真係和諧到你唔信；而我一向無甚好感的「雜差」和「黑腳」（中學時泳池水「漂」金毛成日俾龜逗），他們一般唔會無緣無故喺泳池附近出沒，事關深水埗差館就在不遠處，天時暑熱出入都坐豬籠車涼冷氣好過啦；遇有金魚佬、老童就麻煩少少，不過一般兇吓佢哋、極其量輕輕濕兩嘢就會摺埋。
然而「凱子」卻是最令人頭痛的，「凱子」這個名詞雖然是過氣潮語，但對我們來說卻有另一重隱藏含義，就是代表精神異常人士，「行花市」就是漫無目的四處遊蕩；這個屋邨林立的老區仍然備受這個社會問題困擾，其中尤以元洲街邨更是重災區，幾年前的慘劇就被改編成電影《癲佬正傳》（真人真事，請恕我不講太多了），在這種陰霾籠罩之下，成了驚弓之鳥的教練們，相互之間都會互通消息，守望照應大家的學生，當然九巴陳講得隱晦就是不想引起恐慌了。