「但我唔識點樣䟴蝶腰喎。」Lulu有點苦惱。
 
「噉游水係要練㗎啦,妳得閒咪嚟多啲囉。」游水從來都是靠練習,這是常識吧。
 
「嗯,都好,反正暑假無嘢做。」Lulu聳聳肩輕鬆的說道。
 
我奇怪的問:「妳無做暑期工咩?」
 
「吓?我不嬲都無做喎,第時返工返成世仲未夠咩?」Lulu理所當然的回應。
 


哦妳有錢,巴閉哩。
 
「噉妳鍾意就逢一三五嚟囉。上次問你約總舵主約成點呀?」我順便八卦下。
 
「無呀,師兄未得閒教游水,不過我約咗佢嚟緊星期日去睇戲,嘻。」Lulu得戚得眨眉眨眼。
 
「哈,好似有啲進展喎,上次我吹學游水都係借口啫。」難得有新進展,我都戥她高興。
 
「嘻嘻,我第一次同男仔去街咋,所以想聽日約阿心去買衫囉,我大部份都係運動衫。」Lulu喜孜孜的說。
 


唉~阿火雲邪神,妳同瘦妹一般的麻甩我都有眼見的。
 
「噉真係幫妳唔到了,阿心都要遲多兩星期先返啊。」我都愛莫能助了,雖然我都好掛念她。
 
仍身在泳池的我倆,現在已經是星期五晚了,她豈不是只餘明天可以裝身。
 
「哎吔~我搵咗佢幾日啦,個衰嘢去旅行前又唔講低。」對於阿心的「不辭而別」,Lulu仍耿耿於懷。
 
「佢哋出發前都好忙嘅,唔記得啫。」出發前連見一面都難,問我就最清楚了。我頓了頓續說:「妳搵【肉園】啲同學陪妳去唔得咩?」
 


「唉呀~我唔想畀同學知道我約咗師兄呀。」傻大姐都有細心的一面。

已有 0 人追稿