《我老婆唔係我女朋友》【那些年／九十年代學界／真人】 第七章全新中篇！: 【第八章】 條粉皮係有啲嘢嘅（４）
「啊～仲好！幾識體諒他人，易地而處為對方著想，明明你咁仆街，佢都唔當一回事，大量呀。」Leon讚不絕口。
「門小你鹵味你講隱晒啦，又話神仙又話佛。」我咕噥著忍不住吐糟，轉頭隨時又話女神觀音同體呀。
驀地想起那天他們在水上樂園和在Big John相處的情景，對當時所生出的那種異樣感覺終於有領悟了，記得南宮夫人引述【佛洛弗得】話過（一定係，除非唔係），人在甚麼的瞬間開始萌生愛意，就是在開心講起某人的事的時候。
噢，我唔記得講南宮夫人係邊個添，上學年逢星期五上課（話說現在已經放暑假了，所以已經是上學年的事），我都轉科改修Essential of Feminine Psychology and Physiology（女性基礎心理及生理學），南宮夫人就係呢科嘅客席講師，佢嗰本教科書就係阿May逢星期五都買嘅《姊妹》了；大家記唔記得舊年阿心「半迫帶𠱁」的昆我去舞會，我找Leon諮詢並幫忙籌組「雅典娜保衛陣線」，當時他跟我促膝分析，究竟阿心和我算唔算有曖昧呢，Leon曾經揶揄我無好好研讀《姊妹》的內文，從中認識少女心事；所以自此以後每逢星期五，我都放棄睇缺乏內涵嘅公仔書，改而進修兼具文學、哲學和醫學的《姊妹》，其中的專欄「南宮夫人信箱」，更要期期精讀背誦，所謂「每週拜讀一遍，強勝寒窗十年」。