《我老婆唔係我女朋友》【那些年／九十年代學界／真人】 第七章全新中篇！: 【第八章】 博士大叔（４）
返回座位見到第三張熟悉的面孔，是終於蒲頭的Leon，但奇怪反而唔見了阿心。
可能見我拚命東張西望的樣子吧，Leon跟我說：「唔使兩頭望喇，Lulu孖咗老佛爺去廁所呀，見少陣唔怕嘅。」
自從那次蘭桂坊走失後，我就好怕失驚無神唔見咗阿心。
呵～Lulu真係聽話出擊，約佢一齊嚟，扮吓傻先。「咦，乜Lulu都嚟咗咩？」
可能我個蠢樣真係呃唔到人，一嘢就俾挑通眼眉的Leon踢爆。「唔使問梗係你叫佢打畀我㗎啦？」Leon不答反問，一副胸有成竹的模樣。
「嘿，我見你一支公，咪順口問吓高妹嚟唔嚟囉，噉你咪又可以陪吓佢，畀返老佛爺我二人世界囉。」我表情有點尷尬卻是真心的說道。
「哈哈，真係唔該晒～趁記得畀返你先。」他順手從袋中取出《真夏の果実》隻CD交還給我。
條友仔應該意會到我叫Lulu找他的背後含意，畢竟他為人比我世故，所以我也不再多說了。
未見其人先聞其聲的Lulu和阿心聯袂而回。「喂姊妹，咁遲㗎。」Lulu用招牌開朗的聲音叫我，然後指著Leon向我投訴：「呢個衰人頭先帶人去行『常青徑』，講鬼故嚇人呀。」衰人當然是指Leon了。
阿心瞪大眼睛望著Lulu稱呼我姊妹。
「我唔知點解佢係都鍾意叫我做姊妹。」我無奈的向阿心訴苦。
「你哋趁我去旅行時搞過結拜咩？！」阿心仍是瞪著燈籠一樣的大眼迫問我和Lulu。
「喂我講啲【山大】歷史妳知咋喎，咁都算衰？」Leon叫起冤枉。
一時之間四個人各自各同時說話，加上四周愈來愈多人聚集，真的混亂非常。