《我老婆唔係我女朋友》【那些年／九十年代學界／真人】 第七章全新中篇！: 【第八章】 觀星（１）
觀 星
這時候在場的幹事向每人派了一個旋轉星圖，是大小兩塊圓形卡片重疊後釘在一起。
「嗱，我哋一陣就用呢個星圖嚟搵星嘞，佢由兩個轉盤組合而成嘅，底轉盤係星圖同月份日期，上面轉盤就係時間同顯示天空嘅窗口，窗口呈橢圓形，標示有東南西北方向，譬如你向北天空觀看，就將呢個星圖窗口北方向下，就可以對照嚟辨認天空嘅星座同佢所在位置。記住首先轉動星盤將你睇嘅時間對應月份同日期啊。」李博士絮絮叨叨的續說。
眾人開始試用這旋轉星圖，當然在地庫活動室無夜星睇了，所以不消一會，博士就繼續他講座的最後部份。
「各位，我講埋最後呢部份就會移師天台實戰嘞，一開始要搵英仙座可能唔係咁容易，所以我哋會先搵三粒比較光亮同容易辨認嘅星做指標，呢三粒星構成一個夏季大三角，分別係天琴座主星織女、天鷹座主星牛郎同埋天鵝座主星天津四。當你成功辨認到呢個等腰三角形之後，天琴、天鷹、天鵝、天蝎及人馬座都應該可以順利搵到㗎喇。完成咗夏季大三角之後，我哋先會正式轉向東北方搵英仙座。好，噉大家稍後一齊上天台，我哋用星圖加埋指南針同望遠鏡再實戰一下，暫時講座到呢度為止了，多謝大家參加。」李博士的講座終於散場。