《我老婆唔係我女朋友》【那些年／九十年代學界／真人】 第七章全新中篇！: 【後記】 廿五年後（２）
在【建橋】畢業後，剛好遇上電腦、網絡和科網狂潮，一眾吹水系同學紛紛投身資訊科技行業、撈吓dog com、搞吓科網上市，我也不例外，一做就做了廿多年的IT狗，在一家港資SI撈個經理仔，可惜人工仍比連登仔FG的最低工資還差；公司是行內所謂的「艇仔」，日常主要是靠接外判Project為生，部門組員十隻手指數完。
「西九電競場單嘢條『氣』好貴喎，有無同第二間格過價㗎？」Simon又捽佢條𡃁，事關每個Project成本愈高，大家的分紅就愈少。「氣」在IT行內即是代表bandwidth線路的意思。
是呀，港資IT公司只計你「老底（底薪）」，要有雙糧或花紅，就只能拚命壓榨每張單的成本，這方面大家是同氣連枝的，Team Spirit好得不用去Team Building。
「哎吔～問過喇，間間都差唔多，不如叫腦細幫手問吓有無枱底價？」Ken走投無路竟然想我幫手。
「哦？你條乜嘢氣呀，要平幾多呀。」我又即管問問吧。
同期的同學有幾個都做Telco的，反正今時今日報價都只是Send個Wtsapp罷了，一點不麻煩。想了想，找馬飛吧，佢做緊嗰間【簿餅】，最近又食埋【佐史】，孭條數應該大到阿媽都唔認得，佢為咗跑數，夾佢落價時可以狠啲。
