《我老婆唔係我女朋友》【那些年／九十年代學界／真人】 第七章全新中篇！: 【後記】 廿五年後（７）
我已經唔敢提我今日食咗兩餐午飯…
「哼！你今晚同我落街跑返10K先好瞓呀。」女王下達指令。
「吓…我今晚睇《紅白》直播喎，可唔可以聽晚先跑呀？」沉迷日本文化的中佬，在除夕坐定定睇《紅白歌合戰》的情意結，港女是無可能理解的。
「哦，聽日畀個官你做好唔好？早早哋跑完返嚟睇咪得囉！你唔好詐詐諦諦呀，戴埋隻apple watch落去，返嚟畀我睇，跑到到數為止呀。如果唔係我教唆姐姐，幫你部白色新～『Router』清潔吓。」話說老婆是家中坐館，印印就係佢個字頭（屋企單位）嘅雙花紅棍，所以老婆的說話就是硬道理。
明明唔係做sales，點解都要好似馬飛一樣「跑數」…
我心中一寒，想起年青時這個「鄉下婆」，又是無端端在地鐵上講出「撒亞人」瀕死後，重生變強的道理…似乎這個我認為的無知少婦又在我不察覺的情況下，洞悉了Router不是Router的真相…
「哎～唔好，千祈唔好掂我部機，好貴同好難先抽到㗎～跑就跑啦…千錯萬錯都係我錯，部Router係無罪㗎。」現代女性全都是電器界的John Wick，俾佢哋掂一掂部第五代白色Router就必定極樂往生了，高手真係唔使用劍嘅，比我媽以前要用「萬劍歸宗」更高明；而姐姐更是Magneto轉生，是東南亞「起晒朵」的電子產品殺手，在家中一向是「藍威寶香氣生，電器彼岸早登」。