[中六續集][愛情][懸疑？]擁抱，失憶(重修版): 四.

「就係啱啱你起身嗰陣，我一攬完你，你就失憶喇。」我溫柔咁摸住佢個頭：「不過好快你又冇咩事，一間再講啦，幫你吹頭先。」

講完，佢就拎咗個風筒過嚟。

「坐好。」我拍咗拍佢膊頭。

佢轉身背住我，等我幫佢吹頭。

我開著風筒，但係吹下吹下，我個靈魂都吹走埋。



「喂！」佢推開我：「熱死我喇！」

靈魂飛返嚟嘅時候，我已經趺咗落地下，個風筒都比我掟咗出去，趺咗落梳化到。

「做咩？」我完全唔知發生咩事。

「你個死人頭係咁對住同一個位吹，我啲頭髮就嚟著火喇！」佢鬧我。

「Sorry啊，啱啱諗緊其他嘢，冇為意。」



佢原本拎起咗個風筒諗住開著佢繼續吹，但係聽到我咁講就擺低咗。

佢嚟到我身邊扶起我：「仲諗緊啱啱失憶單嘢啊？」

頭先個屎忽一嘢撞落地下，痛到兩隻腳失去知覺咁滯。

佢翹住我，柺下柺下咁行返梳化到坐低。

我嘆咗啖氣：「係啊。」



佢開著風筒：「唔洗咁擔心喎，可能係中過肺炎有腦霧啫。」

「我諗應該係。」我苦笑。

講係咁講，但係腦霧同失憶應該就冇咩關係，就算有都未至於咁誇張，我會咁答佢只不過係唔想佢擔心。

我見佢差唔多搞掂，就著咗鞋先。

「你搞掂嚟後樓梯搵我啦，我去食枝煙先。」我行出門口。

「好啦。」佢嗌我：「淨係一枝架咋！」

「知道喇。」

講就話食煙，事實係我想自己一個靜下，慢慢執返好我腦裡面個亂葬崗。



我企喺後樓梯，挨住欄杆點煙。

我吸一啖，然後呼出淺灰色嘅煙圈。

清新嘅薄荷煙霧順住氣管直達肺部，而尼古丁就直衝大腦，令我個人即刻放鬆咗好多，暫時擺低煩住我嘅一切。

但係當枝煙燒曬，我個人就緊張返，個腦又瞬間比啲麻煩嘢填滿咗。

雖然咁講，但係感覺都係好咗好多，我諗應該係心理作用。