[中六續集][愛情][懸疑？]擁抱，失憶(重修版): 五十二.

「可以啊，但係…」

要抄低咩？

佢打斷咗我：「你自己揀。」

我自己揀？

「真係？你唔自己揀？」



我抄比你架喎。

「你自己揀。」

好啦咁。

「收到你。」

既然係咁，咁我就揀句有感覺嘅嚟抄啦。



…

..

.

我用咗好幾個鐘終於睇曬成本書，而個腦裡面都有幾句印象深刻嘅句子。

「係咪淨係可以抄一句？」我問佢。



因為嗰幾句喺我腦裡面個份量都差唔多，真係好想寫曬佢。

「有時人係必須要作出選擇。」

簡單啲講即係淨係可以抄一句。

我相信佢要求我咁做一定有佢嘅原因，所以我都冇再追問。

我拎起筆，將六句寫曬喺筆記簿嘅第一頁。

「要揀一句喎。」佢再次強調。

我都知，但我要啲時間。

我慢慢咁去重新審視每一句，同時都慢慢咁逐句劃咗佢。



最後淨低嘅呢一句好熟口面，但係又好似漏咗啲咩咁。

「我揀好喇，但好似怪怪地。」

句嘢好似冇咗前面嗰部分。

「讀出嚟聽下。」佢合埋眼仲打坐緊。

我清咗清喉嚨：「愛就是不問值不值得。」

讀出嚟之後感覺仲怪咗。

「有咩咁怪？」



前面唔係仲有嘢架咩？

「前面唔係仲有句『你問我愛你值不值得，其實你應該知道』架咩？」

因為我之前睇啲濕鳩語錄嗰陣好像見過，但句嘢冇咁短。

「咁你覺得冇咗前面嗰兩句，呢句嘢係咪都係一樣咁有意思？」佢反問我。

其實前面嗰兩句又真係對最後嗰部分冇影響。

「係啊，但…」

我想問點解會有唔同，但就比佢打斷咗：「因為你啲濕鳩語錄嘅對象好廣，所以要連腸都畫埋出嚟，但張愛玲本書嘅對象始終唔夠濕鳩語錄廣，所以佢唔洗寫咁多。」

所以前面嗰部分係人哋加上去嚟令佢易明啲之類。