[中六續集][愛情][懸疑？]擁抱，失憶(重修版): 七十五.

//

「你講未架？」佢彈咗我額頭一嘢。

佢咁樣一彈，直接將我由回憶彈返去現實，差少少變埋離魂記。

掛住諗舊時，都唔記得佢等緊我講嘢。

「而家講。」我清咗下喉嚨：「雖然真愛冇一個客觀嘅定義，但我覺得你就係我嘅真愛。」





//

愛冇一個客觀嘅定義，更何況真愛？

人會講得出真愛同愛，完全係源自於感覺。

我覺得真愛，就係陪你行到人生盡頭嗰個。

而家，我想邀請你陪我一齊行落去。





//

「咁點解係草戒指嘅？」佢問我。

有兩個原因嘅。

「你唔覺得草戒指代表我哋嘅感情好純粹咩？」我微笑：「冇銅臭味之餘，仲有浸青草味。」

我講完都覺得有啲怪怪地。





「愛情有青草味唔太老嚟喎。」佢苦笑。

咁又唔係嘅。

「講緊好天然同冇雜質啫。」

冇咩特別意思。

//

其實求婚最重要嘅係咩？

戒指、地點、排場，定係對白？

除非你黐線到喺M記求婚，否則最重要嘅係心。





//

「仲有冇嘢講架？」佢扁嘴：「都冇諗過嘅。」

你就冇諗過。

「梗係仲有啦。」我又清咗下喉嚨：「你記唔記得嗰時我飲到醉曬咁走去返學？」

如果冇記錯應該係中六開學幾日之後發生嘅事。

「梗係記得啦。」佢敲腮：「勁臭囉唔該。」

嘔吐物又好難唔臭嘅。





「總之就多謝你陪咗我咁多年、照顧咗我咁多年啦，希望你可以陪我一齊行埋淨低嘅人生。」我深吸一啖氣：「或者我唔係最靚仔、最有錢嘅新郎，但我會盡力咁去付出我嘅愛、照顧你、珍惜你，令你成為最幸福嘅新娘。」

大概係咁啦。

「喂呀，好公廁啊啲台詞！」

橋唔怕舊。

「咁你鍾唔鍾意吖？」

都最要受。

「你話呢？」佢抺咗下對眼：「我願意。」

咁就掂曬啦。