[中六續集][愛情][懸疑？]擁抱，失憶(重修版): 九十二.

「應該唔會又嚟多隻戒指啩？」佢嘟起嘴：「真係估你唔到喎。」

我果然係一個有新意嘅人。

「你等我一陣。」我拎開佢個頭：「而家拎比你睇。」

我爬落床將一早印好嘅「契約」拎返出嚟，之後就擺喺電腦枱上面。

「過嚟睇下啦。」我拉佢埋嚟：「好重要架。」





佢攤喺到拎住張紙睇咗陣，之後就遞咗隻手埋嚟。

「梗係得啦傻佬。」佢微笑：「比枝筆我。」

我遞枝筆比佢，佢簽完名就連埋枝筆咁遞返張紙比我。

「搞掂。」我簽名：「冇得反口架。」

呢張嘢全靠自律。





「知喇傻佬。」佢錫咗我面珠墩一啖：「但點解係『一直記住對方嘅』？」

因為從來冇一份嘢寫過呢句。

「記住係最重要架。」我搲住下巴：「有時做唔做同記唔記得係冇關係。」

做唔一定因為記得，但唔記得就一定唔會做。

「雖然我聽唔明。」佢搣咗下我面珠墩：「但我知你有你嘅原因。」





知就得啦。

「咁你今日想去邊啊？」我摸住佢個頭：「行街？」

我完全冇諗過今日要去邊。

「我想啊…」佢搲住下巴：「睇Youtube。」

都得嘅。

「你拎張被過嚟吖。」我開咗電腦就坐返上床：「冚住張被睇啦。」

坐得舒服啲，啲片都好睇啲。

「個竇喺到啊。」佢擘開雙手：「快啲入嚟啦！」





我同佢攬埋一舊，之後就伸隻手出去撳開條片。

明明熊仔頭一套微電影最多就半個鐘左右，但我哋一睇就睇到出面天都黑埋。

都啱嘅，快樂嘅時間係過得特別快。

我打住喊路咁望出窗：「天都黑埋。」

一講完，我個肚就即刻打曬鼓。

「比你搞到我都好肚餓添。」佢摸住個肚：「快啲換衫落去買嘢食！」

你條友真係使人唔洗本架喎。





「知喇知喇。」我起身：「而家即刻去。」

不過我就係鍾意比你使。