沙頭角與長洲的距離(重修版): 八.

「都唔好玩嘅。」佢翹埋雙手。

「你咁得意，點會嚇到人啊。」我串佢。

「哼！」

講完，佢就直接轉身急急腳咁行去戲院，而我就慢條斯理咁喺後面跟住佢。

佢行得快咁又點？飛係我買嘅，所以拎飛個QR code都喺我部電話到。



同我諗嘅一樣，佢企喺拎飛部機前面𨂽咗𨂽地，然後擰轉頭望住輕輕鬆鬆嘅我。

「快啲啦死人頭！」

我從容不迫咁嚟到佢身邊，慢慢拎部電話出嚟。

「快啲啦，仲成隻樹懶咁，七點半喇！」佢係咁𨂽地。

我睇咗睇錶，真係七點半。



大撚鑊！

我加快動作，匆忙咁拎完飛之後就跟住佢衝入戲院。

好彩正片之前都有唔少廣告，套戲喺我哋入去嗰陣先啱啱開始。

呢套係一套喺香港取景嘅港產愛情電影，開場嘅畫面係夜晚嘅屯門街景。

街燈發出淡黃嘅燈光，燈光喺調色之後變得更加柔和。



柔和嘅燈光打落佢塊面到，為佢女神級嘅樣加咗幾分戲劇感，可以話係錦上添花。

唔知係佢有側眼定係第六感感應到我望緊佢，佢面對住個銀幕開聲同我講嘢。

「你睇我定睇戲啊？」佢問我。

「我冇望你啊。」我講得有啲心虛。

講完，我就望返住個銀幕。

講真吖，比起愛情片，我對愛情動作片有興趣啲。

我有幾次差啲瞓著，但係偷睇佢一眼之後又會精神返。

關於套戲嘅劇情，我完全唔知，但係佢個樣我就睇到夠曬本。



套戲差唔多完，愛情電影必備嘅催淚橋段都喺呢個時候出現，而我都開始隱約聽到微弱嘅啜泣聲。

係咪右邊傳過嚟？如果係嘅話就唔關我事，因為佢坐喺我左邊。

我仔細咁聽咗下，啲聲喺左邊傳過嚟。

係咪佢？