沙頭角與長洲的距離(重修版): 十一.

上咗船之後，我哋嚟到窗邊嘅兩個位坐低。

啱啱坐低，我就比窗外嘅夜景吸引住。

窗外可以見到對面岸高樓大廈外牆上面七彩繽紛嘅燈飾，係香港引以為傲嘅維多利亞港夜景。

對上一次嚟呢到已經係六、七年前嘅事，即係中六畢業旅行嗰陣。

我對呢兩岸嘅夜景已經冇曬記憶，呢個就係我會比窗外夜景吸引嘅原因。



隻船好快就開始郁，慢慢離開碼頭。

直到咩都睇唔到，我先轉個頭返嚟望住身邊嘅佢。

佢翹埋雙手、粒聲唔出咁坐喺我隔離，木口木面嘅佢好似有啲嘢想講。

「你做咩啊？睇落好似好唔開心咁？」我搭住佢，將佢拉埋嚟：「講嚟聽下啦，唔可以咁快有嘢瞞住我架。」

佢擰咗擰頭，苦笑住咁講：「冇啊，有啲驚Long D啫。」



「有心嘅咪唔係Long D囉，冇心嘅住隔離樓都冇用啦。」我講出我嘅諗法。

拍拖講嘅係心意，心意嘅傳達係冇距離限制。

「咁你有冇心先？」佢認真咁望住我。

「我講你都唔信，但係我可以證明。」我將塊面進一步挨埋佢到。

佢塊面霸曬我嘅視野，我可以清楚見到佢瞳孔裡面嘅我。



「你想做咩啊？」

我冇答佢，深呼吸咗一下，鼓起最大嘅勇氣，然後…

輕輕咁、溫柔咁錫落佢個嘴到。

我玩嘢咁嘆咗啖氣：「初戀比咗你，初吻又比埋你，真係。」

「講到好唔情願咁喎你！」

講完，佢就轉身背住我。

我拍咗拍佢膊頭：「唔好嬲啦。」

佢冇答我，淨係縮咗縮膊。



我諗起我個FD喺佢條女嬲嗰陣就會埋個頭落佢條女個肚到扮貓，結果唔洗十秒就氹到條女笑到四萬咁口。

不如…我都試下？

我踎低喺佢前面，然後用頭捽佢個肚。

「你喺到做緊咩？」佢露出同黑人問號一樣嘅表情。