沙頭角與長洲的距離(重修版): 十三.

「咁行啦。」佢拖起我隻手。

我跟住佢，嚟到咗頂樓。

一打開門，面前就係佢超長嘅工作枱，工作枱左邊係一個三層嘅白色鞋櫃，裡面得一對白色跑步鞋同一對Adidas嘅黑色拖鞋，而右邊就係一個同我差唔多高嘅層架，裡面擺咗唔少濕星嘢。

佢換咗拖鞋：「你坐下先啦，我仲要落去整嘢。」

講完，佢就出咗門口，留返我一個喺屋裡面。



我除咗鞋就坐喺佢張工作枱前面，諗住就咁坐喺到等佢返嚟。

但坐咗一陣，我就開始覺得有啲悶，最後都係忍唔住開始參觀佢間屋。

行完冇咩特別嘅廚房、廁所同露台，我就嚟到佢睡房，亦都係呢間屋唯一一間房嘅門口。

講到睡房，呢個永遠都係訪客嘅禁地。

唔單止係因為睡房擺咗好多私隱到淨係可以比自己見到嘅嘢，仲有就係女仔比起男仔更加在意睡房比人睇曬。



我企喺門口猶疑咗好耐，最終都係行咗入去。

除咗係因為人類與生俱來嘅好奇心，仲有就係…

我應該唔算係訪客？我係佢條仔啊大佬！

房嘅中間係佢張床，床左邊係佢個衣櫃，而右邊就係佢嘅化妝台。

我坐喺床上面搖咗幾嘢，感覺都幾軟下。



唔好諗多咗，我試張床嘅軟硬程度絕對唔係因為嗰啲嘢。

話曬我今晚要瞓呢張床，而家試下佢咩料都好應該啫。

我喺唔同嘅位都試咗幾嘢，試下試下就試到嚟佢張化妝枱隔離。

我坐喺梳妝台前面，化妝台後面有個可以見到內街嘅窗。

頭先入嚟嗰陣冇留意，嚟到化妝台前面先見到枱面淨係得爽膚水同補濕霜。

都執得幾…

等陣，唔對路喎。

得爽膚水同補濕霜，所以佢一直都冇化妝？



喂…唔撚係啊？

我耷低頭，想開啲櫃桶嚟睇下，但係化妝台下面…

根本就冇櫃桶。