沙頭角與長洲的距離(重修版): 三十七.

佢吹住口哨，滋滋悠悠咁喺陶泥上面刮下刮下。

佢越刮越慢，好似冇咩電、開咗低電量模式咁。

過咗好耐，佢終於搞掂。

我著返條褲：「我哋去換衫？」

「梗係未得啦，等我整好比你睇下先啦。」佢收好工具：「你去出面等啦，順便幫我招呼下啲客。」



「哦。」

講完，我就出去坐喺收銀台。

坐一陣，個頭耷一下。

坐一陣，個頭耷兩下。

坐多陣，個頭耷鬼曬。



唔知過咗幾耐，我後腦比人重擊咗一下。

我從夢中驚醒，發現啊晴企咗喺我身邊。

「做咩啊？」我問佢。

「叫你幫我睇鋪，你竟然瞓著咗！」

「吓，我瞓著咗咩？」



佢反咗個白眼：「係啊死人頭！」

「Sorry啊，咁你整好喇？」

「係啊！」佢開心到跳起：「成品正到癲，你快啲嚟睇下。」

講完，佢就推門入返去，而我都跟住佢入去。

枱上面嘅陶泥已經變咗做陶瓷，而我第一時間諗到嘅係…

「咁似假鳩嘅？」我唔小心講咗出嚟。

佢用手指敲咗敲我個頭：「喂呀！藝術品嚟架！」

「Sorry，咁你而家係咪要搵返啊恩嚟拎？」



「係啊。」佢打電話：「拎得喇！」

「嗯，好。」

「點啊？」我問佢。

「佢就到，等佢到咗再講。」

我哋返出去坐咗冇耐，啊恩就到咗。

「係咪整好喇？」啊恩問。

「係啊，你想要袋定箱定點？」啊晴回應。



「唔洗啦，我捧走佢。」

「吓，咩話？」我同啊晴異口同聲。

「你知舊嘢…」

啊晴想勸佢，但比佢打斷咗：「我知啊。」

「咁好啦。」啊晴嘆咗啖氣：「一間有咩事唔好話係我。」

「知喇。」

啊晴入去將呢件被我命名為「早晨常餐」嘅藝術品拎出嚟，擺喺啊恩面前。

點解係「早晨常餐」？因為兩隻蛋一條腸。



啊恩仔細咗檢查咗一輪「早晨常餐」，之後就仔細咁掃瞄咗我一轉。

我終於知道啲女仔成日講嘅視覺強姦到底係咩一回事，同埋呢單嘢有幾唔舒服。