沙頭角與長洲的距離(重修版): 五十一.

「屌你啦！一定要高材生先可以識啲嘢架？」的士佬比咗隻中指我。

咁又係嘅，大學畢業可以係戇鳩，例如政府嗰班。

而無讀書嗰班又唔一定咩都唔識，好似李家誠咁都係小學畢業咋嘛。

「咁我想問呢兩樣嘢可以點套用落愛情到？」

我覺得呢個係重點。





我蠢蠢地，建議你直接講埋比我聽，如果唔係我諗到出年都仲諗緊，到時就真係正宗諗樣一個。

「你傻唔係扮架喎！」

我想架咩大佬！

佢彈走個煙頭：「唉，我講啦。」

啲老人家就係咁架喇，死都係要屌鳩你先。





「講嚟聽聽。」

快啦。

「好似啲女人覺得你出軌咁，只要佢覺得你有，佢發個夢都可以係你出軌嘅證據。」

咁…

「如果調返轉呢？」





即係佢覺得我唔會出軌。

「如果佢覺得你係好男人、係唔會出軌，就算佢見到你同個女人瞓喺同一張床，佢都會覺得你哋係齋瞓覺，呢個就係信則有，不信則無，因為愛情係建立喺信任上面架嘛。」

一段關係入面冇信，又好似真係咩都做唔到。

「咁吸引力法則呢？」

請你繼續講經，幾有道理下。

「好似你覺得佢一定會離開你咁，而呢個你想像中嘅結果就吸引咗你去咩都唔做、唔努力，,而最後佢就因為你咩都唔做而離開你。」

都係嗰句。

「如果調返轉呢？」





好嘅話又會點吸引法。

「如果你覺得佢一定唔會離開你，而呢個你想像中嘅結果就吸引咗你去咩都唔做、唔努力，,而最後佢就因為你咩都唔做而離開你。」

我有少少懷疑佢係咪播緊同一段錄音。

「兩句一樣架喎師傅。」

除咗前面嗰句，後面有咩分別？

「後面係一樣，所以咁都講明愛情係應該要若即若離先會令你努力。」

多謝曬。





「我明喇。」

都唔知你講緊乜鳩。