沙頭角與長洲的距離(重修版): 六十五.

我真係從來都冇請過假，因為我間公司可以話係長年都唔夠人用。

無計啦，依家個個都飽讀詩書，邊有人肯做埋啲咁撚辛苦嘅工。

同埋就係…我間公司嘅人工低過同行。

你問我點解仲喺到做？

好簡單，就係因為龍叔同文叔。



因為佢哋喺我仲係新仔嗰陣好比心機咁教我，就算我嗰陣成日飲醉酒射波佢哋都冇嬲我。

之後可能係因為我想報恩，又或者係同佢哋真係好啱傾，所以我都冇諗住轉公司。

講真嗰句啊，錢呢啲嘢夠用咪得囉。

賺得再多都好，去到最後都係帶唔走。

既然係咁，咁點解唔搵方法去令自己活得開心啲？



呢個世界上有好多嘢都可以用錢買返嚟，但開心唔得。

你可以用錢去買到一個球，但唔代表你有時間打波。

你可以用錢去Book到一間Partyroom，但唔代表有人同你開Party。

所以為咗要令自己開心，我決定今日要請假。

我打過去龍叔到，而佢都即刻聽咗。



「做咩咁早打過嚟啊？」

梗係有啲嘢啦。

「龍叔…」

但係我又唔係咁好意思講出口。

「做咩啊武仔？」

作返個藉口先。

我壓低把聲：「我病得好嚴重啊，今日返唔到。」

應該過到骨啩。



「咪扮啦，講真話。」

果然薑還是老的辣，一聽就知我扮。

「無嘢喇，我依家換衫出門口。」

喺我諗住收線嘅時候，龍叔嗌停咗我：「係咪你女朋友有事啊？」

你點知架？

「係啊，不過…」

我諗住講話唔請嘅時候，佢又打斷咗我：「你去搵佢啦。」



咁你哋呢？

「兩個人好難搞架喎。」

做唔掂架。

「得啦，我哋會搞掂架喇。」

咁睇嚟我都冇拒絕嘅理由。

「多謝你啊龍叔。」

發自內心咁多謝你。