沙頭角與長洲的距離(重修版): 七十.

我深吸一啖氣：「要嚟喇。」

我作為一個廚房科學家，基本上每次都會將個廚房變成核爆現場，差在冇蘑茹雲飄上天咁解。

而我要煮嗰樣嘢都會發生變異，變成毒過砒霜嘅毒藥。

不過我諗煲個茶咁簡單應該冇咩問題啩？

//



雖然雜貨鋪老闆娘啱啱先同我講完點整，但我都係上網搵咗教學嚟睇住整，因為我完成唔記得。

無計啦，我金魚腦啊嘛。

我將啲嘢洗乾淨之後就連埋兩碗水一齊倒咗落個細煲到，之後就開大火。

「大火要十五分鐘。」我用電話Set咗個計時器。

//



「叮！」

十五分鐘過去，係時候轉中火。

「呢個要二十分鐘。」我扭細個火，之後就Set咗個計時器。

//

「叮！」



二十分鐘過去，係時候加紅糖落去。

上面寫話根據自己想要嘅甜度，即係要試味啦。

我對舊紅糖對半切開，方便我調味。

我放咗半舊紅糖落去之後就拎咗隻大湯羹嚟滭起佢，然後就用脷尖試咗下。

「唔夠甜。」

我講完就放埋淨低咗半舊落去，之後再一次用脷尖試味。

「都係唔夠甜。」我拎住同一羹嘢諗咗陣：「落白糖應該都一樣啫。」

我一手繼續拎住隻羹，另一隻手就去搵白糖。



//

我落一羹白糖，之後再試嗰一羹嘢。

「唔夠甜。」

以上呢個動作同呢句嘢重複咗幾次，而我都係仲未發現到有咩問題。

//

我落糖落到有啲躁：「是撚但啦！」

我放棄咗調味之後就直接熄火，而啊晴都喺呢個時候起咗身。



佢搲住頭、打住喊路咁行過嚟：「咩味啊？」

你嚟就啱喇。

「有野飲喇。」我指住個煲：「暖宮茶。」

希望煲野唔係太難飲啦。

「你好好啊！」佢攬咗下我之後就拎隻羹嚟滭咗一啖：「試下先。」

佢毫不思索咁將成羹野倒咗入口，然後…

「嘔！」佢衝入廁所。

吓，咩事啊？