別人名字，我的姓氏(上集): 8. 小龍女的邀請

「程詩敏同學」真係冇估錯，體育老師兼排球隊帶隊老師Miss Lung已經企左係課室門口等我
 
「係，搣時龍，有咩問題?」
 
「頭先我見妳打排球唔錯，仲可以左右開弓添，難得可以左右手都做到扣殺，有冇興趣加入排球隊?」
 
真係冇俾我估錯，搣時想我加入校隊
 
「Miss Lung，多謝妳睇得起我，但係…我放學仲要去湊兩個細佬，所以未必可以成日練波…仲有…」我望一望四周
 


「我媽咪未必批准我參加校隊」係時間拎媽咪出黎啦
 
「我都明嘅，做家姐係有責任，我都知妳想幫Miss….呀…媽咪分擔下，始終妳爸爸成日唔係屋企」
 
點解佢會知我媽咪係邊個架?
 
「Miss Lung….即係妳知道…..我媽咪…同姑姐…仲有婆婆….」我面有難色
 
Miss Lung笑一笑「我地全部老師都知，當然我地唔會講出黎。希望妳可以考慮下啦」
 


「係……我會」
 
「細細佬而家點呀?」
 
「呵，佢呀，日日都痴住我嘅」
 
「妳地三個都生得好似媽咪，總之妳唔好浪費自己天分OK?」
 
「嗯，我會考慮下」
 


估唔到全部老師都知道我存在，咦?咁河馬咪隨時會咬我囉
 
「Jasmine!!!小龍女同妳講咩呀?」Annabelle係我身後講
 
「哦…佢叫我入排球隊，不過我話屋企未必俾」
 
「妳屋企係要妳不停讀書果種?」
 
我斜斜地頭諗「又…唔係嘅，只不過我有兩個細佬要湊，比較麻煩」
 
「兩個細佬?佢地幾大呀?」
 
「大果個就五年級，細果個K3， 兩個都係讀聖類斯，我而家就返去教佢地功課啦」
 
「真係辛苦妳囉，妳洗唔洗煮飯添呀?」


 
「咁又唔洗」
 
我煮飯?呵呵…炸左個廚房都似
 
我搭車返落堅尼地城，落車後再去婆婆屋企接返兩條粉腸
 
返到屋企就換衫，然後三姊弟係廳到做功課
 
浩翹好乖仔，永遠都係自己做功課，然後去瞓
 
浩揚呢?成績一向都唔差，所以我都唔洗太擔心佢地兩個
 
「呀….家姐呀…揀邊間中學好呀?」
 


係喎，浩揚要揀中學啦喎
 
「你可以升返聖類斯架」
 
「又係到?唔好啦，讀左就快10年啦，有冇第二間呀?」
 
「咁King’s囉」
 
「都得，冇問題」
 
「不過男校黎架喎」
 
「男校先好玩，可以玩到好癲」
 
「咁你咪注定溝唔到女囉」


 
「挑!家姐妳夠讀女校啦，咪又係溝唔到仔」
 
「而家唔係我去溝仔，係d仔黎溝我」
 
「妳有人溝咩?」
 
「冇」
 
「咁咪係囉」
 
正仆街仔