別人名字，我的姓氏(上集): 15. 了解一下同學

「Jasmine…妳今日個飯…」
 
「d飯?唔洗咁驚訝喎，我每日都係食咁多飯架啦」
 
Annabelle望住Katherine點一點頭「佢的確係一個飯桶」
 
我望住盒飯「今日的確係多左少少嘅」
 
「係喎，平日妳媽咪唔係俾咁多飯妳架喎」
 




「妖!一定係我細佬幫我裝飯!!!」
 
我地再睇一睇Katherine個飯盒，嘩!正!!
 
有燒肉、雞胸(去骨)、有菜
 
「鍾意食?分d俾妳地丫」
 
Katherine飯盒d燒肉出奇地好食
 




我地一邊食一邊傾計
 
「係喎，Jasmine，我地未知妳屋企人做咩架喎」
 
好啦，有人問啦，希望唔會穿煲啦
 
「我屋企呀?」
 
「我估妳父母都係高收入人士喎」Annabelle真係幾聰明
 




「點解妳咁講呀?」
 
「妳地三姊弟，仲係住西環尾海皮有會所嘅屋企，即係唔差得去邊啦」
 
「呀…我爸爸呀…係飛機師」
 
「飛機師喎!!!」
 
「我媽咪…係教書」
 
「做左主任級啦?」
 
「做緊啦」
 
「睇黎妳屋企真係幾有錢下」




 
「咩呀，佢地有錢者，我好窮架，佢地將D錢俾我兩個細佬多」
 
「點解呀?」
 
「佢地讀私校，學費都唔平架」
 
「不過妳零用錢都唔少喎」Katherine講
 
「咁我公公都會俾下錢我嘅…」
 
「妳公公仲未退休?」
 
「未架，佢係診所醫生」
 




「妳屋企真係全部都高人黎」
 
俾妳地知道姑姐同婆婆嘅話，我係咪會變外星人架?
 
我地三個食完飯，係學校到不停行
 
係途中，我地見到媽咪係到教緊同學功課
 
「咦，果個就係Miss Lam啦」Katherine對我地講
 
我都要扮唔識咁
 
「Miss Lam係生物科科主任，佢係我地學校連續7年嘅優異生，人又靚又溫柔」
 
係囉，係屋企鬧仔鬧女鬧老公個樣妳地未見過者




 
有好多同學行過都同Miss Lam打招呼
 
呢個時候，Annabelle對住我諗緊野
 
「喂…搞咩呀?」
 
「冇呀…剛先覺得呢，Jasmine妳生得好似Miss Lam喎」
 
唔係呱!!!咁快?
 
Katherine都細心望一望「係囉，兩個都咁靚女嘛」
 
真係頂你個肺，嚇得我丫
 




「難道妳想似大白鯊?」
 
「似佢有咩好呀?」
 
「突然間撲出黎咬住獵物，然後左揈右揈」
 
「佢咬薯片就差唔多」
 
「大白鯊喎」
 
「我成日見佢拎住包薯片周圍行架」
 
真係日頭唔好講人，就係Annabelle講完呢一句後，姑姐就出現係我地後邊
 
仲要拎住包熱浪
 
「三個，檢查校服」
 
我地三個就咁無啦啦俾姑姐捉左入訓導處
 
好彩，我地d校服都著得整齊，所以好快就係訓導處出返黎
 
「嘩…大白鯊真係好恐怖」
 
「佢果個氣場呢，真係拍得住校長」
 
「咁佢地係兩母女嘛」
 
「不過大白鯊都真係好靚下」
 
「特別係對住妳微笑果陣，妳係會feel到有股寒氣」
 
大家睇黎都好驚姑姐
 
返到課室後，班主任宣佈夠期換壁報
 
所以要點名要d同學幫手整
 
結果我同Annabelle，同埋Katherine都被編入同一組到
 
即係繼排球隊之後，我又要忙多一樣野啦
 
返到屋企立即攤上床
 
點解中學生涯係咁攰架…..
 
我瞓到媽咪煮好飯，我先識起身出去
 
食飯時我仲著住校服
 
「你呀!!!死仔!!唔好再質咁多飯俾我呀!!!」
 
「家姐妳食多d啦，妳睇妳，一返到黎就瞓到成隻豬咁」
 
佢咁講…又冇錯嘅…