別人名字，我的姓氏(上集): 21. 賽程出台啦

經過婆婆對Annabelle同Katherine父母嘅了解後，都明白雙職父母嘅難處

所以佢地屋企都會有相關嘅改善

不過就算改善左之後，佢地都會對我個飯盒念念不忘

每日佢地都會走過黎「瞭解」下我個飯盒

「喂，搞咩呀妳地兩個?」





「冇呀，欣賞下妳個飯盒者」

「咪又係好似平時咁囉，有咩好瞭解」

而佢地都會「瞭解」得好盡

「呀~~~~Miss …妳媽咪煮野真係好好食呀!!!」

「妳地屋企點呀?」





Annabelle咬住舊燒肉「媽咪轉左間冇咁大嘅行囉，中型都做到冇命，如果係Big four就死得，而家咪準時放工囉。爸爸係Site agent，會忙少少」

「爸爸真係咁忙?」我問

「d大判Project man好麻煩，規訂邊日邊日落石屎，佢地無聊出去巡一巡，又話d師傅唔跟method statement，果時爸爸又要捉個pm去飲下茶，不過都好左d架啦」

我地一齊望住Katherine

「我?爸爸咪繼續接Case囉，媽咪就減少左工作量，所以都可以早d返屋企煮飯」





「睇黎做大狀都好慘」

「自己一個人處理哂所有野，就算入左大Chamber，都有好多野都要一腳踢」

「咁妳爸爸唔轉做事務律師?」

「唔….可能佢鍾意打官司啦，有時佢會為左一單case而唔返屋企瞓，或者半夜返chamber研究case」

「咁犀利?」

「咁…做大狀係咁架啦，小敏妳爸爸呢?」

「今日佢好似飛英國，差唔多四日後先返」

「妳爸爸成日飛，妳地屋企冇問題架?」





我反一反白眼「我媽咪係邊個呀?我屋企邊會咁易有問題，最難捱d日子都捱過左啦」

我地幾個坐係一邊細聲講大聲笑

每日嘅Lunch都係咁過

係放學後，我地仲有時會行下街嘅

又到左練波嘅日子

係充滿住香味嘅排球房內，大家都望住Isabella貼出黎嘅幾張賽程表

「A、B、C Grade賽程係哂呢到!!!我地今年目標，係升上D2!!!」Isabella非常激情咁叫





我同Annabelle細聲講「佢好似波有成竹咁」

「佢好想殺上D1掛」

「今年我地要再努力D!!!」

以Isabella咁嘅幹勁，睇黎我地都要不停咁練習

「唏!唏!唏!」

係球場上，我地不斷練波，令自己技術提升

而成班F.1隊員，不自覺地將我成為左中心球員，所有進攻，不論前排後排，永遠都係將個波set俾我去打

教練連同其他人都發現左呢個問題，F.1組嘅排球隊好似變左我專屬球隊咁，為我一人服務





所以，教練做左一項決定

「Jasmine!」

「係!!!」

「妳暫時坐埋一邊先，然後F.2同F.1對打10分」

我住埋一邊睇，果然冇左我嘅F.1隊，完全唔似一隊球隊

「Jasmine妳睇到有咩問題?」

我如實答出黎





「進攻防守唔穩，冇一個核心去指揮其他人」

「冇錯，係一班F.1同學之中，妳就係果個核心，如果妳一唔落場，結果就係咁樣」

我企一企起身

「咁不如我而家落場……」

「坐低」小龍女講一講

「但係佢地唔識打喎」

「難詭道妳想球隊一直都以妳為重心?直到畢業?」

「但係…我能力比佢地高」

「妳能力高我承認，妳就好似當年Miss CHEUNG咁可以一個人挑戰籃球隊，但係唔代表妳可以做到D咩」

我聽到小龍女咁講，好快坐一坐低

乜打波能力高都有錯咩?

果然不出本小姐所料，F.1妹俾F.2班姐姐打到體無完膚

之後，教練仲俾左個指引我

「Jasmine妳下次場友誼賽想唔想落場?」

「教練妳叫到，我一定會落場」

「OK，咁我安排下」

今日練完波後，除左我之外，F.1其他同學都好攰咁