《想溝到女千祈唔好學我咁》: 2.8

「咩…咩事又拎返枝筆出嚟玩？」阿雄一邊假笑，一邊臉青青咁問。
 
「玩唔玩，就睇你哋啦。」我不懷好意咁講。
 
說時遲那時快，我地企咗喺學校嘅籃球場，亦有好多圍觀嘅同學。
 
「得唔得㗎…」喺籃球場上，阿南好擔心咁問我。
 
喺我嘅威逼之下，阿星喺籃球場上設下咗擂台，除咗佢籃球隊嘅成員之外，任何人都可以同佢1on1，先取兩分者勝。勝者得$100，輸者就要答應阿星一個要求。
 




雖然要求都只係加入手球隊，但一早就講定仲邊會有人嚟挑戰？
 
「唔好嘥你啲錢啦，我哋俾心機去搵人好過啦。」佢仍然心急如焚咁講。
 
「冇問題喎。」
 
好快，已經有一個挑戰者出現，係一個面無表情，眼神卻充滿俠氣嘅男仔。
 
「報上名來。」阿星毫無怯色。
 




「3B班，胡一刀。」
 
「遼東大俠胡一刀？」阿星詫異咁講。
 
「我開波先？」胡一刀問。
 
「隨便。」
 
「Check波。」胡一刀將波拋俾阿星，阿星立刻回傳俾佢。
 




頃刻，胡一刀將籃球擲向籃板，再繞過阿星衝向籃底接應，最後以一個反手走籃作結，成個過程乾脆俐落，速度之快，令阿星一時間都未能跟上。
 
「有趣。」阿星眼神變得嚴陣以待。