《想溝到女千祈唔好學我咁》: 2.9

到阿星開波，佢將成個人重心調低，身體向左傾後，以一個假動作呃過胡一刀，再立刻轉向右邊切入禁區，點知胡一刀仍然緊貼，令阿星一時間亦冇辦法起手。一個失神，手上籃球更被胡一刀拍出三分區。胡一刀搶返主動權後，直接衝入禁區，打算突破阿星因失誤而產生嘅空檔。


但阿星見識胡一刀本領後，亦不敢怠慢，迅速調節返節奏之後，已經追得上胡一刀嘅速度。誰不知胡一刀突然將腳步向後縮，一個後徹步射球，球徐徐入網。


二比零，設下擂台嘅第一場，阿星已經落敗。從胡一刀純熟嘅技巧，獵豹般嘅速度，阿星驚訝此等高手竟然冇加入籃球隊。但落敗嘅佢，反而露出狡黠笑容。


「利害，好高興認識你。」阿星向佢握手，眼裡盡是意猶未盡之意。






「一百蚊呢？」


「一百蚊喺到，借問刀兄有冇興趣加入我哋手球班？」我遞上一百蚊，順便問。


「手球班？」






「見刀兄你，行動敏捷，出手果斷，確實係我哋手球班需要嘅人才，雖然暫時只係興趣班，但有刀兄你加入，變成校隊亦指日可待。」其實我都唔知手球隊需要咩人，但做得運動都係需要咁上下嘅運動奇才啦。


「咪住！」阿星叫停。


「點解你唔入我哋籃球隊呢？」佢問。






「有符文安嘅地方，我唔會去。」符文安係我哋學校籃球隊嘅射手，亦係人氣高企嘅萬人迷。​​​​​​​