《想溝到女千祈唔好學我咁》: 3.12

「唔要！我唔要你親近南姐姐，佢係我㗎！」佢一路嗔鼻水一路講，原來呢個小鬼當咗我係佢情敵。

「咁你頭先搞到南姐姐唔開心你知唔知點做？」

「我會同佢去搵寶藏。」

「你同若儀合作，南姐姐就會好開心。」

「點解？」





「南姐姐想見到你同若儀成為好朋友囉。」

不過我都唔明白，點解我咁想令阿南釋懷，因為係佢頭先對我嘅信任？但當佢見到我拖住聰聰，由更衣室入面出返嚟時望住我果個鬆一口氣嘅笑容，我覺得好溫暖，好似好耐都冇見過，咁真摰嘅笑容。

「聰聰，做咩咁百厭，匿喺更衣室？」阿南扮到責怪咁問。

「佢唔見咗一啲嘢，但而家搵返啦係咪啊？」我問聰聰，佢點點頭，然後似懂非懂咁望住我，果然仲係小朋友。

「你搵咗幾多個寶藏啊？」聰聰鬆開我嘅手，走去問若儀。





「搵咗4個啦，但爭一個。我唔知咩係『友誼萬歲』。」

「會唔會係我哋上次喺禮堂表演果陣唱果首歌？」

「果首係叫友誼萬歲咩？」若儀如夢初醒咁問。

「好似係啊，去搵咗先啦！」聰聰捉住咗若儀隻手就跑走咗，淨低我哋一班人喺到。

「卓正，真係唔該曬你，可以哄得返聰聰出嚟。」龍Sir對住我講。





我好似聰聰咁點點頭，一時之間都唔太識俾反應。

「但我知你一定會守承諾㗎可？」但下一句，佢就語帶有啲正經咁問，似乎想追究我頭先嘅越軌行為。