《想溝到女千祈唔好學我咁》: 6.3

但正當洛賓成為英雄之際，喺落地嘅時候一時失足而扭倒，傷勢令佢唔可以繼續比賽。

Andy Warhol講過：「每個人都有15分鐘的時間成名。」。本來呢一刻係佢人生最光輝嘅時間，佢仲想帶領球隊贏得比賽，佢仲想可以威俾睇唔起佢嘅人睇。

「啊！」佢仰天長嘯，好唔甘心。

「嗚...」佢坐咗喺後備席低頭痛哭。

「冇事，我會幫你贏返返嚟。」阿雄用毛巾蓋住洛賓嘅頭，遮蓋佢嘅醜態。





「喂。」洛賓叫住佢，然後遞上佢比賽帶住嘅護腕。

帶上護腕嘅阿雄，眼神史無前例地凌厲，同平日「女人型」嘅佢好唔同。

「點解阿雄變咗第二個人咁嘅？」我問。

「你冇睇過佢打乒乓咩，佢一比賽就係咁。」阿星喺我側邊講。

「真㗎...？我仲以為佢講笑。」我身邊嘅嘉慧講。





「佢講過咩？」挨喺阿星側邊嘅阿月問。

「妖。」阿星聳肩擺脫阿月嘅倚靠。

「佢叫我一定要嚟睇，話如果佢有份上場一定會令我跌眼鏡。」「咁你跌定眼鏡都得。」阿星答。

望住嘉慧，突然對阿雄毅然放棄打乒乓球嘅原因搵到一啲端倪。

代替洛賓上場嘅阿雄，喺冇任何表現下，已經俾對方重重困住，或者佢哋都吸收咗輕視胡一刀嘅教訓。





「阿雄掩護我！」控球嘅胡一刀講，阿雄隨即走向胡一刀，將佢從防守球員中解救。胡一刀再從低傳球俾其他隊員，鋼門錯估射球方向，打算跳起擋波，點知俾胡一刀呃倒，佢得到隊員回傳，直接從射球線遠擲，球就如一道重炮強轟入網。

「掂啊！兩分炸！」阿雄講。

「大家都打得好啊...」見到班進攻球員仍然唔放棄咁追分，場旁嘅Miss Lam不禁低吟，一啲眼淚水更喺眼圈打轉。而防守嘅球員亦好似裝咗好多個大盾咁，一一擋住對手進攻，就連恆仔都意外地擋到好多幾乎必入嘅波，之後嘅比分真係如佢哋所願打成平手。

「最後一球就交俾你。」恆仔對住阿雄講，開波前阿雄對住胡一刀做咗個「X」嘅手勢，胡一刀點頭表示明白。開波之後阿雄成為傳球軸心，喺場中間馳騁，不斷傳球之間亦都係咁避開對手阻攔。輕盈嘅身軀左穿右插，如入無人之境，直搗對方陣地。或者咁多年打乒乓真係令佢步法比其他人靈活，尤其係重心轉移嘅處理。

而喺射門前一刻，佢向著場角跑，而胡一刀亦同時向另一個場角跑，喺佢哋相交果一刻，阿雄後手將波交到胡一刀手上，胡一刀一拎到個波之後毫不猶疑馬上射門，速度之快令鋼門一時間都反應唔切，直至個手球喺球門入面停止轉動。

望到呢個天衣無縫嘅配合，所有人都目瞪口呆，尤其係嘉慧，佢驚訝得好似一個木頭人咁定咗喺到。入波之後，阿雄對住佢舉起V字手勢，呢個時候，我更肯定佢係想表現比嘉慧睇自己都有威風嘅一面。

「贏咗...贏咗啊！！」隔咗一陣，阿南先猛咁拍嘉慧膊頭，大家先意識到勝利。

大家都估唔到，呢隊新成立嘅球隊，竟然可以險勝對手，即使過程係好艱難。全場嘅人都報以鼓勵嘅掌聲，而胡一刀，亦順理成章成為賽事MVP。而佢哋每人都得到一個小獎牌，去紀念今次嘅勝利。「賓。」阿雄揚起佢嘅拳頭，示意同洛賓碰拳。