《想溝到女千祈唔好學我咁》: 8.1

「佢好醉啊，扶佢去梳化休息先啦。」喺洛賓拆穿我對阿南嘅感覺之後，佢就好不負責任咁醉到完全昏睡，於是阿南就提出呢個建議。

「阿南，我唔係...」正當我打算解釋時，佢截停咗我。

「得啦，你唔係鍾意我啊嘛，否認係你強項啦，扶佢過去先再講啦。」佢強顏歡笑咁諷刺我，然後就行開咗。

「你個死蠢，做乜以前唔同佢講清楚！」阿柔拎完熱毛巾，經過我果陣都踩多一腳。

佢哋將洛賓扶到去梳化之後，大家都有貢獻，有人準備垃圾袋，有人幫佢敷熱毛巾，有人幫佢冚被，甚至幫佢解開頸頭鈕，只有我企咗喺原地，好似好不知所措咁。





但最令我不知所措嘅係，明明係我俾人講咗我嘅秘密出嚟，點解變咗好似我係罪人咁？我又應該點同阿南解釋？

「飲啦。」阿星呢個時候行咗過嚟，遞咗罐啤酒過嚟。

「你哋知㗎，都唔係我唔想講。」

「我哋知有咩用？的而且確果陣係你自己傷害倒阿南。」諗諗吓，冇錯，係我。

如果唔係我唔識得防備，唔係我咁衝動，我同阿南，可能真係可以一齊走落去。





「男班長！麻煩追返曬啲通告！」過咗喪禮，過幾日阿南都返返學。重回校園之後，果個正能量滿滿嘅阿南已經回歸。

喺我眼睛所及嘅位置，見佢可以重拾返屬於佢嘅甜美笑容，好開心咁同阿柔仲有嘉慧講笑，我都安樂好多。

「吓...仲有大半班人未交喎。」

「唔理！搞掂佢！」佢笑嘻嘻咁講。自從佢返嚟之後，佢對我嘅態度好似唔同咗，比起以前更加粗魯同直接，會更加將自己真性情嘅一面喺我面前表現出嚟。

更加開始會使喚我做嘢，係使人唔使本果隻，不過一切都係更親近嘅表現，所以我都照單全收。





「係...」

「嚟啦，最多搞掂請你食雪糕。」佢用手指逗一逗我下巴，搞到我好似佢隻狗咁。但對住佢嘅欲擒故縱，我完全被馴服。

「喂，你哋三個！交通告！」我嘅頭號目標，當然都係呢三條友。「咩通告？」阿星問。

「聖誕晚會啊！唔簽當你唔去啊！」

「簽！即刻簽！」佢講。

「家長簽名啊！」

「得啦，佢OK㗎啦。」然後佢就冒咗佢阿媽簽名。

其他同學都好順攤咁交咗通告俾我，唔洗一個小息已經差唔多收齊。





「喂月姐，交通告。」我搵上阿月。

「喔，呢到。」佢向我遞上通告。

「嗯？做咩唔去？」

「唔想去咪唔去。」

「去啦，好玩啊。」「煩唔煩啊，都話唔去。」佢今日有啲燥，可能又係女仔每個月嘅「例行公事」。

「好啦。」我收咗佢張通告之後就搵下一個。

「等陣。」但佢又叫停咗我。





「？」

「你果日陪住我，我就去。」佢拋咗一個難題俾我。

「緊係唔得，我要陪阿南。」

「阿南果日都唔去。」

「你又知？」

「佢同我講，佢話佢媽媽果日生日。」佢哋幾時開始熟…

我攞返阿南嘅通告出嚟睇，果然係寫唔去。