《想溝到女千祈唔好學我咁》: 8.5

雖然我同阿南之間好似發生過好多事，但又好似冇乜邊樣係可以用一個物體去紀念住。

「你聽啦，好聽㗎！」

「我唔聽流行曲。」

「第二個你可以唔聽，但Eason真係聽得過呢！」

「唔要。」





係喎，佢鍾意陳奕迅。

「我尋晚終於睇倒陳奕迅個演唱會！好好睇啊真係！」

「你完夢啦，終於睇倒。」

「最衰睇得一場！首大開眼戒真係唱得好好聽！」

佢曾經為咗睇陳奕迅通宵去排隊買飛，我果晚仲同佢Whatsapp咗成晚。





「懷著樂觀總有轉機啊嘛，我自有方法。」

「你…唔係唔聽陳奕迅㗎咩？噻…」

「你講到咁好聽，咪聽下囉。」

「衰人、壞人、仆街！」


仲因為陳奕迅，先可以令我氹返嬲咗我嘅佢。「你哋話，如果我錄一首陳奕迅嘅歌俾佢，佢會唔會感動？」我對住大家問。





「嘩...正哥你真係變喇。」洛賓嘆曬氣咁講。

「真啊，竟然會為咗個女仔做呢啲嘢。」阿雄都附和。

「但係你五音不全㗎喎師兄！」阿星講出咗個重點。

「好嘢喎李卓正，有勇氣！我撐你！」竟然第一個鼓勵，會係喺嘉慧口中得到，呢幾個人真係禽獸不如啊。

「點撐，得返咁少時間真係做倒咩？」阿雄依然喺到潑冷水。

「咳，係時候我呢個Sing Con冠軍出場嘅時候。」阿柔突然坐直個身咁講。

「係喎，有阿柔幫手實掂喇！」嘉慧好激動咁講，仲激動過我呢個當事人。





「哈，希望阿南聽到果陣唔會嚇到即刻燒咗隻碟。」洛賓依然喺到蹂躪我。其實我都唔知，我點解會咁有勇氣去挑戰自己咁弱嘅一項，呢壇嘢一定係出醜居多。或者係因為俾阿南果種永遠唔會逃避困難嘅特質感染，如果佢知道我都有呢份勇氣，一定會好感動。

「唔係啊！我係阿南實冧到爆，好浪漫啊！」阿柔好陶醉咁答。

「喂星哥，洗唔洗而家俾個咪唱返兩咀？」阿雄即刻問，點知俾阿星一個重批肘撃中小腌。呢一下都表示，佢仲未追到阿柔，事後先知，原來佢都覺得欠缺咗一個好嘅表白時機，佢再咁拖落去，真係睇到我哋戥佢好心急。

距離聖誕節得返好少日子，而阿柔都講得出做得到，佢即刻搵到一個有玩開音樂嘅朋友，佢都肯借個錄音室俾我哋去錄歌。

「嘩柔姐你個朋友嘅地方，麻雀雖小，五臟俱全喎。」我走入呢個得幾百呎嘅Studio，驚嘆咁講。「係㗎，平時我就喺呢到練歌，阿杰都好好人比我任用呢到嘅嘢。」阿杰就係佢嘅朋友，佢今日都有嚟到幫手。

佢一早為我準備好首歌嘅伴奏版本，然而萬事俱備，只係欠我呢個東風，阿杰同我試唱咗幾次，結果冇一次係可以喺個音準上面，睇阿杰咁難為情嘅樣，心底應該都後悔幫阿柔呢個忙。

「1、2、3 不要著燈～能否先給我摸黑吻一吻～」阿杰明明係唱得幾好聽。

「畢腰著燈～能否先給鵝摩黑蚊一吻～」但去到我唱嘅時候，就出曬事。





「唔緊要，我哋慢慢嚟。」好彩佢係個好有耐性嘅人，逐句逐句咁教我點唱，阿柔都教我點樣發聲發得好啲。

搞咗幾個鐘，先勉強可以將第一段好順利咁唱出嚟。

「好咗好多，係啲拍子要捉得緊少少，試下跟住個拍子機唱。」唔止阿杰，我都開始後悔，其實都好多嘢可以挑戰，點解要揀樣最難嘅學…此刻我心入面，真係要對黃宗澤作出一個大大嘅抱歉，唱得差嘅你冇錯！錯就錯在陳奕迅嘅歌真係好難唱。

「我哋試下成首唱一次。」當練曬成首之後，阿杰話正式錄一次聽吓個效果點。

一邊唱，一邊都覺得好緊張，我不斷喺到諗返起阿杰教過嘅嘢，結果反而仲亂，變到又甩Beat、又唱錯歌詞。

「我教嘅嘢你把聲吸收咗㗎啦，試吓唔好諗咁多，憑感覺唱。」喺第一次試錄失敗後，阿杰都睇得出我嘅問題。

果然，第二次錄果陣我嘗試放低所有記憶，齋憑直覺去唱，果然冇咁多甩漏，更加過倒阿杰果關。





「係啦，好咗好多，唱多幾次應該會再好啲。呃，死啦，原來5點！我突然醒起要去交收，你哋練住先。」阿杰突然講。