《想溝到女千祈唔好學我咁》: 8.10

「阿月好靚喎今晚。」路過嘅符文安講，佢一副狼相咁覬覦住阿月，阿月只係好虛偽咁對佢笑咗一笑。

「今晚做我Partner呢？我帶你識多啲人一齊玩啦。」符文安再講。

「唔洗啦唔該。」之後佢就拉咗我入去。

「全世界都想仆過去佢到，係得你唔落搭。」我對佢講。

「見到佢懶有自信嘅樣就想嘔。」





禮堂正播放住一啲柔和嘅音樂，而且環境都幾昏暗，中間仲有一個舞池，所以好似變到一個小型舞會咁。阿星同阿雄一早已經搵心上人跳舞，落單嘅洛賓就同胡一刀喺到吹水。

「喂，你話會成晚陪住我㗎，你唔好走咗去啊！」阿月見我望嚟望去，就警告我。

「去得邊啦，多一個識嘅人都冇。」我答。「你第一次嚟呢啲Party啊？」見我好似好唔自在咁，所以佢問。

「係啊！以前都唔鍾意嚟。」

「嚟呢到要跳下舞㗎！咁先好玩！」然後佢都拉咗我出舞池。





「咪玩啦，我識鬼跳舞。」我企咗喺舞池，而佢就輕輕擺動身體，已經融入咗呢到嘅氣氛。

「咁樣郁下就得㗎啦，你唱歌都敢啦，唔係唔敢跳舞啊？」之後佢就捉住我嘅手，自己喺到跳。

我依照佢嘅指示，跟住節奏慢慢擺動，講真我一套街坊裝咁同佢跳舞其實個畫面都幾好笑。

「隻手要咁樣先得。」佢突然將我對手放喺佢腰間，然後將佢自己對手搭上我雙肩。

「唔係咁好...」





「殊...跳埋隻舞再講。」唔知係咪受到音樂嘅薰陶，我地都好全神貫注咁互望住大家。有個咁性感又靚嘅女仔喺我面前跳舞，話冇胡思亂想真係呃你，加上由佢身上發出嘅香水味就好似迷魂藥咁，令我有啲迷迷糊糊。喺爭啲把持唔住嘅一瞬間，腦中浮現出阿南嘅樣貌，好似一個警號咁要我保持清醒。

「點解要揀我？明明你有好多選擇。」我問。

「因為你有安全感。」然後佢更將頭伏咗落我到，合埋雙眼咁跳。

「我知你唔會乘人之危。」佢繼續講。

「如果我會呢？」

「我都冇所謂。」呢個答案即係代表咩？代表佢願意俾我抽水？點解？

一個可怕嘅念頭喺我腦中閃過。我唔敢再問落去，我怕會聽到一啲令我唔識面對嘅答案。「食嘢啊...啲Pizza好...食...」突然之間，阿星嘅聲音將我喺兩難中抽離，但佢見到阿月依附喺我身上時，神情都有啲驚訝。

阿月亦即刻離開我嘅懷抱，並且跑咗去搵阿柔。





「嘩，好有艷福喎。」阿月離開之後，阿星即刻講。

「本身你㗎。」我答。

「唔好玩出火就得啦。」佢突然好正經咁講。

「洗唔洗我幫你出火啊！緊係唔會！」我偷襲阿星下面，好輕浮咁講，我有信心我唔會做啲對唔住阿南嘅事。

「喂！睇住啊，搞壞咗點搵食。」

「你仲想搵食？頭先見你哋攬曬喎，得米啦！」

「差唔多！我諗住一陣就同佢表白埋！」佢好有自信咁講。「祝你成功喇兄弟。」我講，呢個已經係，我能夠作出最大嘅祝福。





冇幾耐，學生會嘅司儀就出嚟暖場，為接下來出場嘅表演嘉賓作鋪墊。

「估唔到會有表演嘉賓喎。」連明星嘅真面目都唔多見過嘅我講。

「唔知係邊個呢？有啲期待。」阿月喺我側邊講。

「真係多謝我哋嘅符文安同學，我哋先請倒以下落嚟嘅嘉賓！」

「躡」嘅一聲，一盞Spotlight打咗落符文安身上，全場人都對佢報以掌聲同歡呼聲，而佢都懶謙虛咁揮揮手。

「好喇我哋有請！羅力威！」台上嘅紅幕慢慢升起，羅力威就好似個白馬王子咁，著住一身白色衣服坐喺鋼琴前。

「啊！！羅力威！！」全場嘅同學都好興奮，就連身邊嘅阿月都好似發咗癲咁叫囂，原來佢係羅力威嘅Fans，但之後羅力威講嘅嘢反而令到佢靜咗落嚟。