《想溝到女千祈唔好學我咁》: 10.2

去到溜冰場，阿南好熟手咁租鞋、著鞋，成個過程都好熟練，不特止，啲職員仲會打招呼。呢個時候，我已經覺得有啲唔妥。

「你咁慢㗎，快啲喇。」當佢連熱身都做好，我先啱啱好綁完鞋帶。

果然，我嘅預感冇錯，原來阿南係一個溜冰高手，一踏出溜冰場嘅佢已經好順暢咁自己溜咗幾個圈，反而好耐冇溜嘅我喺踏上冰面之後，雖然未至於要扶住側邊咁行，但因為仲未習慣喺冰上行走而有啲狼狽。不過好快，都可以慢慢咁圍住個外圈咁溜。

「哈哈，你溜得咁慢㗎？」佢問。

「未慣姐。點知原來你係高手啫...」





「我小學已經學識溜冰，初中都成日嚟溜，係呢排先少咗嚟玩。」

「哦...」我暗中嘆氣，估唔到阿星俾第一個建議，已經以失敗告終，手仔又拖唔倒，仲要俾人笑。我有啲灰咁繼續向前溜，點知佢喺突然衝上前面截住我。

「我帶住你溜啦。」佢講，然後就伸出隻手，示意俾我拖住。

嗯，咁都唔錯。於是，喺佢嘅帶領下，越溜越順似乎係理所當然嘅事，不過當然追唔上佢嘅速度。

「追我啊。」當我熟習咗之後，佢又再一次溜走咗。當溜過我身邊嘅時候仲講。





「你慢啲先啦。」我死死氣咁講。

「唔得喎！」佢突然剎停，右腳再伸出去划咗個半圓，將方向移到我面前。

「邊可以咁易俾你追到㗎！」佢叉起腰咁講。

「邊到易，好難囉好冇，你咁快。」

「唉啊，你真係好蠢。」佢答，點解我唔明佢講咩？溜完冰之後，我哋去咗阿雄建議嘅貓Cafe食下午茶，佢話女仔一見到寵物就會變得好開心，又可以滿足佢哋鍾意打卡嘅愛好。而我記得阿南都有講過好鍾意貓，所以我都好果斷咁採納咗佢嘅建議。





「呢間餐廳咁得意嘅？要用啲即棄鞋套笠住對鞋先準入。」去到餐廳門口，阿南問。

「驚對鞋污糟會影響倒啲貓掛。」

「貓？！」佢個反應並冇預期咁開心，反而有啲驚恐。

「我唔入！」佢喺門口拉住我講。

「下，你唔係鍾意貓咩？」我問。

「係就係...佢哋好可愛！但一掂到貓我就會瘋狂打乞嗤㗎啦！」竟然有啲咁嘅事？！

「喔...咁去其他地方食啦。」我答。但我根本唔知附近有咩好食。最後，我哋喺附近搵到一間好「地道」嘅茶記。一入到去，全部一係紋曬身嘅彪形大漢，一係就係粗口爛舌嘅風塵女子。阿南喺入面就好似一隻被狼群圍住嘅綿羊咁，一不留神就會被人嗒咗咁。

「嗯~~~個西多士好香！」佢講。





「你唔介意呢到污糟咩？」我問。

「唏，我由細到大都喺呢啲茶記食嘢㗎啦，有咩所謂，反而係你唔慣啦大少爺。」

「咁又唔會...」連女仔都唔介意，我仲點會。雖然啲衞生情況有啲差，不過啲嘢食真係好好食，價錢又平，絕對係信心保證。

「咁之後去邊啊？」喺仲享受緊個西多嘅時候佢問。

「嗯...本來想同你去睇戲，但啱啱睇...啲戲飛都賣曬了。」我遞上電話俾佢睇。最後洛賓嘅建議係，去睇一套浪漫嘅電影，佢話可以昇華成個約會。

「唉喲你真係好可愛，買定飛啊嘛。」佢摸一摸我個頭咁講，好彩話語中完全冇責怪嘅意昧。