《想溝到女千祈唔好學我咁》: 10.9

我將停學嘅事話咗俾老豆聽，我以為佢會好大反應，點知又冇，淨係講：「咁呢兩個禮拜，你諗吓應該點做喇。」

喺呢兩個禮拜，阿南當然如意料之中冇搵我。聽阿星講，佢喺學校都變得好靜，放學又急急腳咁走。阿柔同嘉慧都花好多時間陪佢，不過佢哋兩個，好似都對我有啲微言。至於阿月，唔知點解佢父母冇再限制佢嘅行動，有陣時放咗學，佢仲要我同佢周圍去。

或者佢係想補償，因為佢呢一吻而帶嚟嘅風波。

雖然我冇責怪佢，件事亦唔係佢嘅錯，但每次佢搵我去街，我都拒絕咗，我實在冇任何心情。停學嘅日子，我就好似行屍走肉咁，每日攤喺屋企睇電視、玩電話，就算出年要考文憑試，都完全冇想溫書嘅衝動。

「叮噹。」有一日，門鐘竟然響起。





「Hi…嘩，你好頹啊。」打開門，竟然係阿月。

「你點知我住邊？」

「阿雄講啊！我求咗佢好耐佢先肯講啊。」

「咁你自便啦。」我冇厘神氣咁同佢講，然後就返咗房瞓覺。一瞓醒，已經係天黑。

我行出房，佢仍然坐咗喺廳睇電影。





「你醒啦？」佢問。

「你仲喺到？」

「冇嘢做啊嘛！呢套係咩嚟㗎？幾好睇喎！我認得呢個人，佢係咪陳奕迅？」原來佢開咗隻《魂魄唔齊》嘅碟嚟睇。

呢套係阿南最鍾意嘅電影，仲逼我要買一隻DVD放喺屋企。每次睇到最後紫雲飛離開嘅時候，配埋首《1874》，佢都會喊到收唔到聲。

「嗯，陳奕迅你都唔識？」其實以前嘅我都一樣唔識。





「電視見過囉，但印象唔多。同埋你上次唱果首歌好似都係佢嘅？」

「嗯。」佢講緊…果隻俾阿南掉低之後俾我塞咗唔知去邊嘅CD。

我坐咗喺佢隔離，同佢一齊睇。明明係一套睇到爛嘅戲，但又再一次乖乖哋咁睇曬。「嘩，你睇到喊啊？」阿月無啦啦遞咗紙巾俾我，我先發現，睇相同嘅情節，我同阿南留住同一樣嘅眼淚。但我知道唔係因為感動，而係我一路睇住套戲，一路諗住嘅都係阿南。

「存在過 一位等我愛的某人 夜夜為我失眠」

「眼乾姐。」我答。

「啊！我煮咗嘢俾你食！唔記得咗添。」佢跑去廚房，拎咗一碗嘢出嚟。

「唉啊，點解會變咗一劈嘢？」佢喺廚房揭開個煲蓋之後講，原來佢煮咗一個麵俾我。

「小姐，麵係會索水然後會發脹。」





「係㗎咩...我第一次整。」佢扮咗個鬼臉，我開始慶幸間屋同廚房仍然係完整無缺，冇火燭。

之後我先知，原來之前佢整俾阿星嘅飯盒，都係工人代勞。

我重新煮咗兩個麵，煮埋佢果份。「嗯，好好食！」佢連啲味精湯都飲埋。

冇幾耐之前，坐喺我對面同一位置嘅，都係阿南，一樣食住我煮嘅麵，點解...咁快就唔同咗人？點解咁快我哋段關係就唔同咗？

阿南，點解我哋會搞成咁？

可唔可以當所有嘢都冇發生過？

「夜啦，你走啦。」食完麵之後，我講。





「唔怕夜喎，我打俾司機就得。」佢答。

「乜你咁死纏難打㗎？」

「我係啊！但我都只係怕你有事。」

「我冇事。」

「冇事你就唔會唔出街，好似自我放棄咁嘅狀態啦。」

「關你咩事呢其實？你唔好煩我啦，你安安份份做返你嘅大小姐咪算。唔好花時間喺我呢啲小人物身上啦，唔好玩㗎。」我答，佢嘅心意係點，我點會感受唔倒？只不過，我唔會係佢值得投資時間嘅人。

「因為我鍾意你啊！我唔想鍾意嘅人變得咁頹廢。」

「嗤，你鍾意我？咁打個印先啦。」





「打咩印？」

「上床啊，你鍾意我咁俾我扑得唔得啊？」