MK學院: 十五.

雙方距離慢慢縮減，終於迎嚟第一次過招。

黃祥用雙手敬酒嘅方式出拳，但就比蘇乞兒用抺碗卸開，仲一個反手拋杯嘅方式用手背輕力咁打咗落佢下巴到。

睇得出係有招式架喎，睇嚟佢哋好似真係有啲料到。

雖然蘇乞兒呢一下冇用盡出力所以唔算好痛，但黃祥都係退後咗幾步，防止自己比人連續攻擊嘅同時擺返好個架步。

蘇乞兒都好講武德咁退開，等佢擺返好個架步先，但就用輕佻嘅眼神睥住佢。





「我中拳就縮啫，你縮咩啊？」黃祥苦笑：「唔洗留手喎，我哋都唔係同門。」

知唔知世上最強嘅武器係咩？係嘴炮啊！

好彩蘇乞兒冇即刻衝上去郁佢，如果唔係都幾柒下。

「過返招熱下身先啫。」蘇乞兒雙手做出飲酒動作，隨後長嘆一聲：「而家嚟料。」

雙方開始進攻，蘇乞兒靠住體形嘅優勢加上熟練嘅抺碗，喺不斷化解黃祥攻勢嘅同時連環敬酒將黃祥逼向圈邊。





黃祥最後比佢逼到站唔住腳，坐咗落張凳到，但蘇乞兒都係冇停手。

黃祥避無可避，就咁跌咗落地下。

蘇乞兒停手，而巧大都開始倒數。

「十！」

瞓低咗嘅黃祥一腳掃埋去，而蘇乞兒反應唔切，就咁比佢掃低咗。





蘇乞兒爬緊起身嘅時候比黃祥乘機拎起一張凳車埋去，就咁又瞓返低。

蘇乞兒喺黃祥爬起身嘅途中碌開，同時大嗌：「擸架撐嘅！」

「我都冇話唔得。」巧大回應：「爛仔打交擸咩都得架。」

聽到佢咁講，黃祥直接將頸上面嘅鐵鍊拆咗出嚟，而蘇乞兒爬返起身之後都將牛仔褲上面嘅鐵鍊拆落嚟。

兩個人再次過招，雖然手法相同但因為多咗條鍊，所以佢哋進攻同防守嘅可達距離係遠咗好多。