MK學院: MK仔女活動事年簿—籃球比賽(4)

比賽開始咗三個字左右嘅時候，玫瑰終於停手。

四葉草比玫瑰打到面腫兼鼻塌，玫瑰都打到自己雙手爆曬血。

玫瑰企起身：「你做咩唔還手？」

係囉，我都想問。

「我想知你有幾憎我。」四葉草苦笑：「我諗我大概知喇。」





佢係咪比人打傻咗？

「如果可以…」玫瑰揈走手上面嘅血：「我想殺咗你啊！」

你哋到底有幾大仇口？

「總有一日你會明我同你…」

佢未講完就比玫瑰撳住咗把口。





「咪撚再講。」玫瑰鬆手之後就一個上勾拳車落去。

四葉草繼續攤喺地下，而玫瑰就加入返場比賽。

狼王喺佢哋打交嘅呢三個字已經入咗五粒波，比分嚟到十比零。

講真呢場比賽已經冇任何觀賞性，因為D&DP班得返黃飛鴻仲健在。

//





黃飛鴻喺中場休息嘅時候嚟到我身邊，我諗我知佢想講咩。

「做咩啊？想投降啊？」我問佢。

係嘅話就快喇，就嚟開下半場架喇。

「得返我一個點打啊？」黃飛鴻唞曬大氣。

雖然冇咩運動精神，但我唔怪你。

「咁你走啦。」

我都唔夾硬留你喇。

「多謝。」





佢講完就慢慢行去校門，而我都開大聲公廣播。

「今場係F班贏，十五分鐘後開下場。」

我廣播完就去教員室飲水同食煙，而武痴都跟咗上嚟。

我同佢望住樓下吹水，吹吹下就見到地龍皇行咗去F班到。

「有啲唔對路。」我望住武痴：「搵揸Fit人問下？」

喺武痴諗住問聲嘅時候，揸Fit人行咗埋嚟。

「你搵我？」揸Fit人問點煙。





真係一講曹操，曹操就到。

「你知唔知地龍皇搞緊咩？」我問佢。

我印象中佢完全唔識F班啲人。

「佢？」揸Fit人搲咗搲下巴：「應該買緊人。」

吓？連打個波都要買？