MK學院: MK仔女江湖事件簿—子彈姐(6)

電話響起，係佢條𡃁。

我聽電話：「喂，拎咗嚟喇？」

拎咗嚟就得架喇。

「揼咗入草叢。」佢喘曬氣咁講：「跟住要點啊？」

忠心到呢到夠架喇。





「走啦。」我嘆氣：「佢唔值得你咁忠心。」

你值得擁有一個更好嘅大佬。

「喂…」

佢想追問，但我已經Cut咗線。

「有冇遺言？」我將槍口再次貼住佢印堂：「比一句你。」





唔想聽你講廢話。

佢吸咗啖氣：「對唔住。」

屌你啦！

「對唔住有用嘅話，差佬同法院嘅存在有咩意義？」我苦笑：「閻王可能會原諒你。」

而我嘅責任就係送你落去搵閻王。





「砰！」

佢啲血喺中彈嘅一刻濺落我塊面到，之後就沿住塊面流落去。

人賤血都臭。

佢個身軟曬咁向後挨，之後就仆咗落地下。

我將枝左輪揼落佢心口：「還返比你。」

拎埋袋錢就搞掂。

我去廁所洗乾淨身上面嘅血跡，之後就嚟到學校門口。

佢條𡃁就企咗喺門口對出嘅草叢，身邊擺咗幾個麻包袋。





呢條友肥夾矮兼五官扭曲，真係有少少似唐氏綜合症患者。

絕對冇歧視，純粹感覺啫。

「喂！」佢拎住麻包袋衝埋嚟：「大佬喺邊啊？」

我上下打量咗佢一番，感覺佢唔似有架生喺身。

不過更重要嘅係佢睇落驚驚青青咁，應該唔夠膽對我做啲咩。

我兇鳩佢：「關你撚事啊！」

如我所料，佢真係即刻縮沙。





「咁好啦。」佢行埋一邊：「你點齊數就帶佢落嚟啦。」

你真係傻得好可愛。

我將啲錢拎返去禮堂擺低，之後就打比巧大。

「搞掂咗個人。」我嘆氣：「但啲嘢仲未搞掂。」

我唔知拎啲錢嚟做咩好。

佢嗰邊傳嚟打火機聲：「嚟緊。」

冇耐之後佢就上到嚟，一開門就一臉疑惑咁望住堆麻包袋。

「撇除我拎曬佢。」我行去佢身邊：「你覺得我應該點處理佢哋？」





我只不過係買返自己條命。

佢望咗望裡面，之後就搲咗搲下巴。

「不如…」巧大沉默咗幾秒：「比返你覺得有需要嘅人。」

都好啫。

「害過咁多人…」我苦笑：「幫下啲受害者家屬都好合理啫。」

積返啲陰德都好。

「你嚟緊唔洗返學住。」巧大搭住我：「我搵地址比你，你去派咗錢先。」





就咁話啦。