【愛情】關於我一覺瞓醒發現喺初戀屋企⋯！: 01. 你是誰！？
「去唔去再飲呀？」浩宜拖住我行出酒吧
「仲飲⋯？我飲唔到啦⋯！」我搖搖頭，「再飲就要嘔啦⋯！」
我已經覺得行出酒吧嘅時候腳步有啲浮有啲輕飄飄，再似落去嘅話我真係番唔到屋企
「好啦好啦！我送你番去啦Okay？」我見到浩宜側住頭望我，我微微點頭
我托住額頭，跟住浩宜行去的士站，但我都已經覺得頭有啲痛，前路都有啲睇唔清
「聽日又唔洗番工，飲多轉都唔怕啦～」浩宜冇好氣咁望一望我
喺我更迷糊之前，我見到浩宜伸手截的士，車嚟到之後，浩宜㩒低我個頭推我上車，然後坐低喺我隔離
「落車啦知珩！」我喺迷糊間聽到浩宜把聲，佢將我搖醒然後拉住我嘅手肘拉住我落車
「到啦⋯？」我邊一下一下郁出去邊問浩宜，「咁快⋯？」
「係呀係呀⋯到啦到啦⋯」浩宜講道，「你真係唔好再飲，真係會連自己係邊個都唔知⋯」
「唔該司機⋯」我從的士上落地前仲有啲意識咁同司機講唔該
「行啦⋯！」浩宜拉住我行，我幾乎已經係成個人靠住浩宜行
浩宜陪我行到番去大廈嘅門前，浩宜鬆開手，我左右各行咗一步，然後好好咁企定
「你係咪可以自己番上去？」喺我半睜眼嘅狀態下，見到浩宜輕皺住眉頭
「嗯⋯」我點點頭，然後比咗個Okay手勢，「我Okay⋯」
「咁我走啦，你聽朝起身打電話比我呀⋯！」浩宜提醒我
「嗯⋯好⋯」我點一點頭，比咗個敬禮動作浩宜，「你快啲番去，我都快啲番去⋯」
「好好好⋯咁你番去啦⋯」浩宜拍一拍我嘅膊頭
我推開大廈嘅玻璃門之後，回頭望一眼，見到浩宜仲企喺外面，我對浩宜揮揮手後就直接去㩒𨋢
「終於⋯番到嚟⋯」我行出𨋢，拖住腳步行到屋企門口，喺半迷糊嘅狀態下伸手入袋搵鎖匙
「噹！噹！噹！」
我用鎖匙開門，但鎖匙一直插唔到入鎖匙窿，一直敲咗落去鎖匙窿隔離嘅鐵面
我用力咁睜手雙眼一秒中集中然後將鎖匙好順利咁插到入去，開到門番屋企⋯
「唔得啦⋯我就嚟要原地瞓低⋯」我一行入屋，即刻閂上屋企嘅大門
我邊踩住鞋踭將鞋除落嚟，邊將外套除咗落嚟掉到餐枱上，然後直接行到睡房前，將房門推開
喺灘上床之前，我直接將裇衫除咗落嚟掉落地，掀開被就灘落床瞓
「聽日先再執啦⋯」
⋯
「唔⋯」我迷迷糊糊咁比外面嘅陽光照醒，但完全唔想開眼
今日好似係星期四，係我嘅Day off，所以我今日可以瞓多陣唔洗番工
「今日唔洗番工實在太好啦⋯」我喺心入面鬆一口氣
我打算繼續瞓多陣，臉頰喺攬枕上蹭咗兩下，好痛⋯我個攬枕今日咩事⋯點解變咗好似石頭咁⋯？
我慢慢睜開眼，眼前嘅景象即刻令我大腦一片空白
點解有個人瞓喺我隔離㗎⋯？明明呢度係我房先啱呀⋯！我個攬枕呢？我攬住邊個呀⋯！？
我拉開張被望一眼，我身上本來著住嘅裇衫就掉咗喺地，宜家身上淨係著住件吊帶背心
「琴晚⋯琴晚咩事呀⋯？」我嘅大腦高速轉頭，但再點轉都係空白一片
我完全⋯！完全唔記得琴晚發生咗咩事⋯！琴晚咩事呀⋯？我點解會喺度⋯？我琴晚⋯唔係同浩宜一齊番嚟咩⋯？
「喂⋯！」我攬住張被縮到去床邊，然後好小心咁伸手推咗背住我瞓嘅人一下，見佢冇反應又再用力推咗佢一下，「喂⋯！」
「唔⋯」佢發出未瞓醒嘅聲音，但完全冇醒嘅打算
「喂！」我用力咁拍咗佢一下，但仍然同佢保持住一段距離
「咩事呀⋯」瞓喺我隔離嘅人皺住眉頭，仲要慢慢咁轉身坐起身
佢望過嚟同我對望，佢呆咗一呆之後擺出一個完全唔知發生緊咩事嘅表情望住我
「許翊瑜你點解會喺我房⋯！」我將被攬到實一實，用被包住自己
「吓⋯？」佢好似仲係未瞓醒一頭霧水咁，伸手摸一摸後尾枕
「吓咩呀⋯？我問你點解會喺我房⋯！」我試圖冷靜咁同佢講，但我知我面上嘅表情完全係一個鄙視加上震驚嘅表情，「許翊瑜你⋯！枉我咁信任你⋯！」
「你⋯你可唔可以睇清楚先講⋯？」佢坐起身單起眼同我講
我抬起頭仔細咁望一望周圍，床、衣櫃同書枱嘅位置，點解同我房完全唔一樣⋯？
「我想問你點解會喺我房就真⋯」佢望向我然後嘆氣
我點解會喺佢房⋯？琴晚我同浩宜放工之後去咗飲酒，然後番到嚟之後，我就⋯入咗房瞓呀⋯
「唔通我推錯咗房門⋯！」我個腦開始醒，思緒亦慢慢咁變得清晰，「我真係⋯！」
「點呀⋯你仲要喺度瞓係唔係⋯？」佢又嘆氣然後問我，一個冇我咁好氣嘅無奈表情
「唔係！」我即刻掀開張被跳落地，小跑出去嘅同時一下彎腰執起埋地上嘅裇衫
「呯！」我好快咁將佢嘅房門閂埋，然後跑番去隔離房閂門
今次床、衣櫃、書枱，連埋雜物嘅位置都啱晒啦⋯！呢度真係我間房⋯！
「好尷尬⋯！」我將裇衫隨手就掉喺櫈上，然後灘番落床，「我點會入咗佢間房㗎⋯！」
我伏喺床上面，喺大腦逐漸清醒嘅時候回想一下琴晚到底發生咗咩事⋯
「我真係喺呢啲時候蠢到加零一⋯」我攬住張被壓抑住聲線激動咁講
不過⋯我仲係有啲眼瞓⋯灘番喺床度，本來醒咗一半嘅大腦又慢慢覺得覺得攰⋯
「今日Day off，我再瞓多一陣都唔緊要啦⋯我真係仲係有啲攰⋯」我合埋眼，喺心入面一直同自己講
我好想再瞓多一陣，平時番工根本就冇唔可能懶床，鬧鐘一響我就要起身，所以Day off嘅日子我懶一懶床都唔緊要
灘咗好一陣，我個腦都係好清醒，我完全瞓唔著⋯
IG Link: https://www.instagram.com/nd_cotttoncandy/?hl=zh-tw