【愛情】關於我一覺瞓醒發現喺初戀屋企⋯！: 08. 往事

「你想食邊隻？我買比你食。」「呢個！我中意食芝士蛋糕！」

「芝士蛋糕，唔覺好膩咩？」「唔會呀～有你喺度做咩都唔會膩～」

「你最識講嘢啦～講完都唔面紅。」「我講事實怕咩呀！」

以前覺得，只要兩個人一齊，做咩都會好開心，就算係一齊食麥當勞都會覺得好幸福，一件蛋糕兩份食都覺得好sweet

不過，所有嘢都過咗去啦⋯冇再諗嘅必要，大概，係因為最近同佢一齊住所以先會一時感慨良多⋯



番到屋企之後，我先去咗沖涼，番到房之後執一執櫃上面嘅嘢，搬過嚟嘅時候我淨係將啲嘢擺晒上櫃，都未有時間好好咁執下啲嘢⋯

「我媽真係將我間房啲嘢pack晒入箱⋯」我望住書櫃上面嘅嘢，都係啲書書簿簿，我媽真係一絲不苟咁幫我執晒啲嘢，「應該都有9成嘅嘢⋯到時我搬走點執⋯？」

算啦，執住先啦，遲啲搬走嘅時候睇下有咩可以唔要就掉咗佢，不過我都唔知要住幾耐⋯我諗我媽咪都唔prefer我住兩個月就搬番屋企⋯

我將啲書逐本逐本放好，佢呢個櫃簡直係啱啱好，呢間房嘅size同我本來間房嘅size都差唔多，雖然間客房唔大，不過所有嘢都好齊全

我逐本放好放齊，媽咪將我最中意嘅擺設都幫我執咗入箱，我逐本疊好嘅時候，見到下一本要放好嘅係一本牛皮紙色嘅簿，媽咪將我中學本相簿都執埋落箱pack埋過嚟比我



我拎起本相簿，呢本相簿我好耐都冇睇過，一直都比我擺喺櫃上面冇拎落嚟睇

「真係好耐都冇打開過⋯」我慢慢咁將封面頁掀開，第一頁嘅兩張相就係我同阿立一齊影嘅相

「啪！」我將相簿直接合番埋，我都唔知我點解唔想睇落去

就算只係睇咗第一頁，以前嘅回憶全部全部浮晒出嚟，以前嘅事，我冇唔記得

我同阿立嘅開始係喺中五升中六嗰個暑假，喺8月中嘅一次補課之後，嗰一日，我一世都會記得⋯



「食唔食蛋糕呀？」喺行番屋企嘅路上，阿立忽然間問咗我一句

「吓⋯？冇特別想食蛋糕⋯」我覺得佢突然咁講有啲突兀，我搖搖頭

「食唔食lunch呀？」阿立見我話唔想食蛋糕，佢即刻又拋出一個新嘅問題

「唔餓⋯」我輕皺起眉頭，困惑咁望住佢

「食唔食糖水呀？」阿立又即刻問一個新嘅問題，都係同食有關

「唔食⋯晏晝食咩糖水呀⋯」我耷低頭睇手機

唔通佢好肚餓所以一直問我食唔食嘢？肚餓嘅話直接同我講就得，唔洗兜咁大個圈，又唔係第一日識

「咁⋯你想唔想同我一齊？」佢喺安靜咗兩秒之後又問一個新嘅問題



「吓⋯？」我微微抬起頭，視線喺手機嘅螢幕上移開，佢講嘅嘢令我嘅大腦都呆咗一呆，一時三刻間好似唔明白佢講緊嘅嘢嘅意思一樣

我望向佢，佢嘅視線移開都唔望我，佢睇起嚟好平靜，咁佢講嘅意思，應該唔係我諗到嘅嗰一種意思啦⋯

「我宜家⋯唔係同緊你一齊咩⋯？」我就當自己唔知佢講咩，當自己冇諗多咁問佢

「你係真唔明定假唔明呀？」阿立即刻皺起眉頭望住我，「你唔知我中意你咩？」

眼見阿立有啲焦急，我即刻有啲忍唔住笑意，原來我嘅理解冇錯，佢所講嘅意思就係我諗到嘅意思，唔係我多心

「我知呀～」我嘅心情即刻愉快起嚟，連講嘢嘅聲線同語調都變得輕快，「我一早就知啦～不過你又冇講清楚，我唔敢亂答嘛～」

我伸手摵住佢嘅臉頰，佢伸手捉住我嘅手腕，喺捉住我嘅手慢慢垂低落嚟嘅時候，佢嘅手由我嘅手腕移前咗，啱啱好包住我成隻手⋯



佢呢個舉動令我面紅耳熱起嚟，我感覺到自己嘅頸同面都熱辣辣，手心都開始出汗

「咁你要點樣先可以肯定？」佢明明都已經要拖住我，偏偏仲要咁樣問一句，「係唔係要我喺度大聲講出嚟比所有人知你先可以肯定？」

「你咪講囉～」我只係順口咁講一句，因為我唔信阿立會咁樣做

「好呀。」阿立微微點頭，然後深呼吸一口，「李知珩，我中意—」

嘩！！！佢真係大聲嗌出嚟！我即刻慌張咁用手掩住佢個口唔比佢再繼續大聲講落去，成件事太尷尬啦⋯！

「喂呀！你傻咗呀⋯！咁大聲真係唔怕尷尬呀⋯！」我尷尬咁望向周圍嘅人，確保佢唔會再大嗌出嚟之後先鬆開手

「你要我咁樣證明我係真係中意你嘛～」阿立對我笑道，我真係特別中意阿立嘅笑容，中意佢嗰種散發住陽光氣息嘅感覺，身上都會有陽光嘅味道

「我都話咗我知！」我提起手，佢都已經拖住咗我，仲要咁樣證明，「你根本就係特登⋯！」



「你覺得我係，咁我就係啦～」阿立笑笑口咁講，「咁你嘅答案呢？你唔打算講你嘅答案？」

「好呀！」我行到阿立嘅面前輕輕一躍攬住佢，佢嘅左手輕輕咁接住我將我攬住，「同你一齊呀～」

「你未話我知你中唔中意我。」阿立喺呢個問題上追問我，要我比個答案佢

「中意呀～最中意你～」我細聲咁喺佢耳邊講道

我有啲好奇佢嘅表情，特登縮後望佢嘅表情同反應，淨係見到佢一個甜笑，好似食咗蜜糖一樣，不過其實我都係

我地就係咁樣開始咗我地嘅戀愛關係，所有嘢都變得甜蜜又幸福⋯






IG Link: https://www.instagram.com/nd_cotttoncandy/?hl=zh-tw