【愛情】關於我一覺瞓醒發現喺初戀屋企⋯！: 75. 真相
「你繼續口不對心啦⋯」阿立嘅眼神顯出佢嘅無奈，「就算係有聯絡，都唔代表啲咩。」
「嗯，都係。」我微微點頭
諗起佢喺宴會廳同游巧盈傾計，我個心就覺得唔舒服，游巧盈同佢傾計嘅時候，對眼就恨不得痴喺佢身上
唉！唔諗啦！愈諗愈唔舒服！
阿立望住我，不禁一笑，行近我一步，伸手拍我嘅額頭一下：「唔係你自己講㗎咩？我地又未真係一齊番。」
阿立咁樣一講，我即刻無言以對，佢用我嘅說話嚟反駁番我
「用我嘅魔法嚟對付我？」我講出哈利波特電影嘅其中一句台詞
「噗⋯！」阿立不禁失笑，「唔敢唔敢，我邊敢呢？」
「冇嘢啦，我瞓啦。」我撇開臉但又忍唔住瞄佢一眼，「我聽日仲要番工！」
「知啦。」阿立嘅微笑好溫柔，「晚安。」
「晚安⋯」我微微點頭，然後就房門閂埋
我行到書枱前面，手機螢幕都已經熄咗，我再將手機解鎖嘅時候，仍然停留喺我同阿逸嘅對話框頁面
「仲上緊線⋯」我望住阿逸嘅名下面嘅狀態仍然寫住online
我直接退出頁面然後鎖屏，所有勝負，其實好似就係我決定直接已讀不回嘅一刻已經分出⋯
唔公平⋯？或者啦⋯又或者係只要阿立喺我面前，我嘅一切標準就會自動消失
⋯
翌日朝早起身嘅時候，第一個吸引到我目光嘅係一個有30幾個message嘅3人WhatsApp group
「咩事⋯」我㩒熄鬧鐘，拎住手機行去廁所
我邊刷牙邊睇到底個group講咗咩令明明得三缺一嘅group都可以有成30幾個message
靖佑：「食唔食飯呀？一齊，今晚」
浩宜：「好呀，我得呀！@知珩」
係呀，我地三個其實係有group，但係我地好少用group，因為我地多數都係私下約，好少真係三個人一齊食飯
「知珩瞓咗啦？先12點幾」「佢聽朝起身都會睇到㗎啦」
「咁我地講咗食咩先啦」「去唔去尖沙咀食飯？」
「好喎～浩宜姐你最識食啦～有咩好餐廳介紹？」「等我一陣」
下面send咗好幾條link出嚟，果然都係浩宜識食～
「我起身啦，今晚見～」我咬個牙刷騰出雙手覆個message
阿立嘅房門打開，阿立睡眼惺忪咁行出嚟，頭髮都亂糟糟
「早晨～」我望住阿立笑道
「早晨⋯」阿立行到廁所門口，伸手拎起插喺洗手盆隔離嘅膠籃中嘅梳
「我今晚唔番嚟食。」我漱一漱口，拎起我嘅面巾抹嘴
「嗯⋯」阿立都唔知有冇聽到我講嘢，仲係有啲迷迷糊糊，「唔好咁夜番⋯」
「唔⋯呢個就要睇浩宜同靖佑啦～」我笑一笑，然後喺阿立嘅身邊行出廁所番房
⋯
夜晚8點
「啱啱好多人喺我前面，所以遲咗少少⋯！」靖佑急步行入嚟坐低
浩宜醒目，今朝已經book定位，一嚟到就有位坐
「唔緊要啦，你睇下食咩，我同浩宜睇咗啦。」我將餐牌打開遞比靖佑
「唔該～」靖佑打開餐牌睇下睇，然後就點餐
我地坐喺度等餐嚟嘅時候當然唔會淨係坐，邊傾邊等嘅話，時間過得快啲
「點呀？最近同阿瑜相處得好唔好呀？」靖佑一臉好奇咁望住我，係等緊食花生嘅節奏
「Okay啦。」我望咗浩宜一眼，然後半認真咁點頭，我都估到又會提起佢，又會係用我作為話題開始
「阿瑜真係真係唔錯㗎！我都話咗啦～」靖佑自豪咁笑道，「有機會就要好好把握，唔好學浩宜姐咁⋯」
「你認真？」浩宜皺起眉頭望住靖佑，「你確定佢唔錯？」
「阿瑜真係好仔嚟㗎！我覺得佢同知珩幾襯呀～」靖佑覺得浩宜莫名其妙，望一望我又理直氣壯咁同浩宜講
「你認真？佢真係好仔？」浩宜一個唔相信嘅嫌棄表情望住靖佑
我坐喺一邊，望住一個知情者同一個不知情者口同鼻拗，但我唔知打斷咗佢地之後，要由邊一個步驟開始解釋
「你都未見過阿瑜⋯！我男朋友都話佢唔錯，又靚仔又溫柔又識影相，有咩唔好？」靖佑差在未話阿立識飛，讚到佢只應天上有一樣
「你自己話啦⋯你個同屋主⋯」浩宜一個無奈樣望我，但見到我一個尷尬笑容，佢即刻就知道我嘅意思，難以置信咁望住我：「你仲未同佢講？」
「未⋯」我尷尬咁抿住唇小幅度咁搖搖頭
「未同我講咩？」狀況外嘅靖佑不解咁望一望我，又望一望指住佢嘅浩宜，「咩呀咩呀？有咩秘密冇同我講呀？」
「點解你仲未同佢講⋯」浩宜無語咁拍一下額頭，然後朝我伸出手示意：「睇下我地靖佑幾迷惘，請，知珩姐講下到發生咩事。」
靖佑未搞清狀況，呆呆咁望住我等緊我講來龍去脈
「呃⋯係咁嘅～」我嘅視線有啲浮動，拍一下手之後開始我嘅坦白儀式，「呃⋯我同阿立，即係許翊瑜，係ex嘅關係⋯佢就係，我嘅初戀男朋友⋯」
「哦⋯」靖佑微微點頭，我有啲意外佢咁快就毫無波瀾咁接受咗，但兩秒後：「吓！？」
「我聾啦⋯」浩宜摸一摸耳仔
「佢就係你嗰陣講嗰個突然分手嘅初戀呀？」靖佑仍然未喺啱啱我坦白嘅事中回神，仍然係一臉震驚
「嗯⋯係呀⋯」我又點一點頭
「唔係嘛，有冇咁有緣呀？」靖佑露出準備好開始戀愛話題嘅笑容，「隔咁耐都見得番～仲唔係緣份？」
IG Link: https://www.instagram.com/nd_cotttoncandy/?hl=zh-tw