【愛情】關於我一覺瞓醒發現喺初戀屋企⋯！: 77. 心意
「係咁嘅～琴日坐你對面嗰個女仔呢～我想拎佢IG，但琴日唔敢問⋯」卓卓一個怕醜嘅樣，尷尷尬尬咁講道，耳仔都紅咗一截
「你想識浩宜？」我有啲震驚，佢居然係對浩宜有興趣，「卓思齊，睇唔出你咁大膽。」
「佢有冇男朋友？」卓卓忽然間諗起啲咩一樣，伸手拉咗我嘅手肘一下
「冇。」我搖頭，「你加油啦。」
「我、我唔係呢個意思呀！」卓卓即刻有啲慌張，「我只係見佢靚女想識下，人地有男朋友就唔係幾好嘛！」
「好好好～」我望住佢呢個慌張樣都忍唔住笑，「我問下比唔比得IG名你啦～」
「多謝知珩姐！」卓卓滿心歡喜咁點頭，「我會等你㗎！」
「等邊個呀？」阿逸聽到之後行過嚟水吧問
「冇、冇咩～我去做嘢先啦～」卓卓搖搖頭，然後行出水吧行去廚房
「佢搞咩？」阿逸望向我問
我聳肩後一笑，望住卓卓小急步行去廚房嘅身影，拎起手機send咗個message過去比浩宜
「有個小弟弟想識你，比唔比得IG？」
我估浩宜都會係比，但我只係循例問一句
⋯
差唔多收工嘅時候，客人唔算太多，我地喺各自嘅崗位適當咁偷懶
「知珩姐你太好人啦～」卓卓喺廚房行出嚟水吧，盡力壓抑住興奮嘅感覺對我笑道，「你真係又靚又有氣質～」
「唔洗擦鞋啦⋯你加油啦自己。」我無奈一笑，小弟弟就係咁易滿足
「咩事咁開心呀？」阿逸笑問道
「唔話你知～」卓卓笑住回答，只係望向我，伸手捉住我嘅手肘，「知珩姐你真係100分。」
「得啦得啦，就知道賣口乖啦⋯」我無奈咁講
卓思齊都係個顏控嚟，不過冇女朋友，佢以前話過佢眼光好高，但我諗佢有人追，只係佢睇唔上眼⋯
再過咗一個鐘，我地都執好嘢準備走
「我閂燈啦，出面係唔係搞掂啦？」阿逸企喺廚房門口，手放喺燈掣上面
「搞掂。」「搞掂啦～」
見到我地個個都比咗Okay手勢，阿逸就閂燈，cafe即刻漆黑一片，得番出口嘅指示牌同廚房嘅藍光著住
「我行先啦，今日有啲急事要做。」樂恩拎出手機，然後就匆忙咁去推門，「拜拜，聽日見。」
卓卓又話趕住番去交功課，因為今晚就係deadline，所以得閒嘅我就等埋阿逸閂門
「你仲喺度嘅？我以為你都走咗。」阿逸喺廚房行出嚟，行到水吧洗一洗手
「我閂埋啲機嘛，佢地有嘢做走咗啦。」我指一指門口，「你行未？」
「行啦。」阿逸頷首，推住門等我出去，「鎖門先。」
我企喺阿逸身後等佢鎖門，其實我可以走先，但係我又覺得我咁樣走咗去好似有啲太冇人情味
「都係等埋啦，鎖門好快啫。」我喺心入面自言自語
等到阿逸鎖好門，我地就一齊走，但係，其實我冇要佢送我番去嘅打算⋯！
佢突然間就同我一齊去咗地鐵站，一齊出咗車，我有啲震驚同措手不及，同時有隱隱約約嘅唔自在
「今日卓卓好開心，好少見佢心情咁好。」阿逸提起卓卓
「嗯，幫咗佢個大忙。」我笑一笑
「你幫咗佢咩佢咁開心？」阿逸問，我總覺得佢想問呢樣嘢好耐
「幫佢識個朋友。」我冇講得太清楚，始終係卓卓嘅事，講太清楚都唔太好
「哦～」阿逸似懂非懂咁淺笑一下
喺行番屋企嘅路上，嗰種隱隱約約嘅不安感比啱啱變得更強烈更明顯
行人路邊有好多好高嘅樹，街燈嘅燈光喺樹葉同樹葉嘅縫中滲出嚟，地上嘅影都變成一點點
樹葉嘅磨擦形成沙沙聲，有啲嘈，但有微風又唔錯
「咁快又過咗大半年，時間真係過得好快。」阿逸抬頭望住沙沙作響嘅樹葉，忽然間感慨咁講
「時間本來就係會喺你唔察覺嘅時候流逝。」我微微點頭，然後一笑
「時間真係會改變好多嘢，將某啲嘢帶走之後又會將一樣新嘅嘢帶番嚟。」阿逸今日好似特別感慨，但隨住佢嘅感慨慢慢滲出嚟，我嘅內心卻有種難以言喻嘅不安感，「有時就係咁神奇，明明番工好攰，但係都係好期待每日番工⋯！」
「咁番工開心都係好事嚟，你啲甜品又受歡迎。」我附和佢講嘅嘢，腦海中都係平時番cafe嘅開心事，「番呢度cafe真係幾開心，cafe有你穩定軍心、有樂恩做開心果、又有明哥佢地喺廚房煮好嘢食、係卓卓番到嚟又幫得手，有班好同事自然都會中意番工嘅～」
「我地唔係淨係同事得唔得⋯？」阿逸忽然拋出一句令我愣住嘅說話，「我中意你，已經好一段時間⋯」
阿逸喺行到一半嘅時候忽然咁樣講咗一句，隔離馬路上駛過嘅車嘅車頭燈將我同佢企嘅位置都照亮一剎那
喺光打過嚟嘅一刻，我見到企喺樹下影子中嘅阿逸嘅表情，我知道佢係認真
我嘅心跳冇變快，我冇緊張，只係覺得有啲⋯抱歉嘅感覺⋯
「唔⋯」我一時語塞，唔知要答啲咩好，只係用喉嚨發音，猶疑咗好一陣先再開口：「其實我覺得同你相處係幾開心幾自然，但係我只係當你係同事、係朋友⋯但我對你冇嗰種感情⋯」
有時覺得拒絕人係一件好殘忍嘅事，望到對方難受嘅話，自己都會覺得歉疚
我唔敢望住阿逸太耐，心入面嘅緊張感源於怕見到阿逸失落嘅表情，視線落喺佢臉上半秒又要即刻移開
我撇開臉，假裝自然咁將視線落喺馬路對面嘅餐廳，只係想分散一下唔想令成件事咁尷尬
「嗰個人，有啲似游巧盈⋯？」我嘅視線偶然咁落喺一個坐喺對面餐廳窗邊位置嘅女仔，佢嘅側面好似我討厭嘅人，「嗯⋯？好似真係游巧盈。」
坐喺窗邊嘅佢唔知講緊啲咩開心咁笑起嚟，露出同我相似嘅笑臉，我無聲咁輕笑一下
千里迢迢特登嚟到呢邊食飯，邊個咁榮幸可以令游巧盈過嚟呢邊？
IG Link: https://www.instagram.com/nd_cotttoncandy/?hl=zh-tw