【愛情】關於我一覺瞓醒發現喺初戀屋企⋯！: 82. 又見面了
「好啦好啦⋯」我伸手放喺佢嘅後尾枕，摸一摸佢嘅頭髮，「唔會突然消失啦，我以後都唔會啦⋯好唔好？」
「嗯，聽住先，以前你都係咁講。」知珩用力咁捏咗我嘅手臂一下
嗰種感覺真係痛到入心，一直由手臂蔓延開，但我咬緊牙根忍住唔縮手，我知道佢要為自己出一口氣，先可以將呢件事放低
「如果你對我冷淡啲，我都唔會放唔低⋯」知珩鬆開手低聲講道，好似係抱怨緊我一樣
「如果我同係你點頭之交，又或者係普通到冇得再普通嘅朋友，我會好快放低，但可惜我地唔係。」我笑一笑，大家都知道嘅原因，知珩要親口問一次，我要親口答一次，「一齊經歷嘅第一次太多，所以普通嘅關係喺我同你之間唔存在。」
「唔⋯」喺街燈下可以見到知珩臉頰上嘅一抹紅霞
「諗咩？我冇指明講咩，你自己諗咋。」我輕輕一笑，我明明冇指明啲咩事
刻咗喺心入面嘅人，點可能真係可以放就放⋯？每一次回想都係加深記憶，每一日見面都係加深烙印
「冇，冇諗咩，拍卡啦去。」知珩指住大堂入口嘅拍卡機拉開話題，分散一下注意力
我望一望佢，小跑兩步上前拍卡開門，拉住門等知珩先入
知珩喺我面前行入去大堂嘅時候瞪我一下，我只係一笑置之，佢自己諗咋～
⋯
⋯
⋯
「今晚見～」我喺同阿立分開前對佢講
「嗯，今晚見。」阿立微微頷首，轉身向另一個出口嘅方向行
喺同一屋簷下開始一個全新日，又喺同一屋簷下結束一日嘅行程，感覺好有家人嘅感覺
我一如既往番到cafe開始新一日嘅工作，由一開始咩都要問清楚怕做錯，到宜家自己可以有信心會做得啱
「今日嘅甜品。」阿逸拎咗一份甜品比我試味，一如既往
自從阿逸表白之後，佢會下意識迴避我嘅目光，對上眼嘅時話佢都會先一步撇開臉，雖然番工嘅時候都係同平時一樣
「我覺得好似有啲太甜⋯」阿逸遞咗一隻甜品羹比我，「你試下。」
我喺接過甜品羹嘅時候指尖唔為意咁掂到阿逸嘅指尖，阿逸反應好快咁就縮手
「Sorry⋯」阿逸移開視線，表情有少少尷尬咁道歉
「唔洗⋯」我輕輕搖頭，接過甜品羹，然後同平時一樣做甜品嘅第一個試食者，「我覺得味道可以呀，又唔係真係好甜，同平時都差唔多。」
「Okay？可能只係我覺得太甜⋯」阿逸有啲遲疑咁講，下一秒收起遲疑嘅表情，對我笑道：「既然你覺得味道可以嘅話，咁應該真係可以～」
⋯
「卓卓，呢張單係補單，幫我拎咗過去6號枱先。」我喺卓卓行嚟水吧要拎飲品嘅時候，將我啱啱拉好花嘅咖啡小心咁遞比卓卓
「Okay收到！」卓卓本來準備拎佢面前嘅特飲嘅手懸喺半空，然後伸手接咗我嘅咖啡先
「叮鈴鈴鈴～」cafe嘅門比人推開，一個女仔直接行到我面前
「知珩～要杯—」「Cappuccino？」
我喺佢開口之前已經先一步講出佢想要嘅咖啡
「叻女。」佢行到收銀處前面，喺我打算轉身去收錢嘅時候，卓卓好快就行咗過嚟收銀處，「Thank you⋯咦？你咪上次嗰個男仔？」
「你認得我呀？」卓卓笑一笑，睇起嚟有啲意外
「認得呀～」浩宜嘅嘴角上揚，「你唔係問知珩拎咗我IG咩？」
「係呀～」卓卓露出自豪嘅笑容，「靚姐姐你咩名呀？」
浩宜聽到卓卓賣口乖，笑意都忍唔住，果然呀～女仔都係中意比人讚靚女
「你估下？」浩宜嘅微笑充滿住玩味，望向我嘅時候將手指放喺唇前，「唔好同佢講呀～」
「靚姐姐你都太殘忍啦掛～連名都唔比人知～」身高差唔多180嘅卓卓扁起嘴扮可愛嘅時候，感覺有種反差萌
「你叫咩名？」浩宜笑一笑問卓卓
「卓思齊。」卓卓又真係乖乖地話比浩宜聽，不過我諗浩宜就唔會同佢交換答案啦
「Okay～姐姐記住你啦。」浩宜用指尖指一指佢嘅太陽穴，伸手接過我遞比佢嘅咖啡就轉身行出cafe
「知珩姐！靚姐姐叫咩名呀？你話我聽呀～」卓卓拉一拉我嘅衫角，想從我口中聽到佢想知嘅答案
「佢唔比我講呀～」我聳肩，見到佢嘅反差萌就想同佢玩下，「唔係我唔講呀～」
「知珩姐呀⋯」卓卓失望咁扁起嘴，然後雙手捉住我嘅衫袖搖兩下，「最多我請你食飯呀⋯話我聽啦～」
「佢可能會再嚟㗎嘛～下次你再問下佢囉～」浩宜落咗order唔準講，咁我自然唔會輕易鬆口，「你做咩咁有興趣呀？」
「想識下靚女嘛⋯」卓卓講嘢嘅聲量降低咗
「哦～係呀～都好呀～」我抬頭定睛望住卓卓，露出意味深長嘅笑容然後微微點頭
「咩呀⋯！」卓卓撇開臉，但我都係睇到佢紅咗半隻嘅耳仔，「知珩姐你點可以咁樣恰我㗎⋯！」
「我冇恰你呀，佢可能會再嚟，下次你再問佢啦。」我微微一笑，瞄咗卓卓一眼之後又緩緩開口，「佢單身咗好一段日子㗎啦，可能眼角高掛～」
本來耷低頭整緊特飲嘅卓卓聽到我咁講之後怔咗一下，然後小幅度咁抬起頭
「佢係個外貌協會嚟，只要係靚仔都中意。」我裝作不經意咁講道，然後轉身行去洗手盆洗杯，「唔⋯不過唔好睇佢好似好外向咁，佢係嗰種人地唔主動，一世唔洗旨意追到嘅人嚟。」
我講到咁樣，卓卓應該明白我講咩啦掛⋯？就算口講唔係，眼神同表情冇辦法講大話，係最真實嘅感情反映
我偷偷地擰轉頭望卓卓一眼，見到佢好快手咁沖好特飲然後拎出手機打開IG，搵到浩宜嘅IG之後想send message比浩宜
「聰明！」我喺心入面豎起手指公，果然係大學生，一點就名
我算唔算為浩宜做咗件好事？佢成日叫我要向前望、要放低過去，但佢呢？佢咪同我一樣
「唉～」我心情好好咁嘆一口氣，喺行出水吧幫手執枱嘅時候，伸手拍一拍卓卓嘅膊頭
IG Link: https://www.instagram.com/nd_cotttoncandy/?hl=zh-tw