【愛情】關於我一覺瞓醒發現喺初戀屋企⋯！: 92. 和好

「嘟嘟嘟嘟！嘟嘟嘟嘟！嘟嘟嘟—」

「唔⋯」我比一如既往開住嘅鬧鐘嘈醒

睜開眼之後，第一樣映入眼簾嘅係同樣地比我嘅鬧鐘嘈醒嘅阿立

「李知珩你個鬧鐘⋯」阿立用手臂遮住雙眼低聲抱怨

「嗯⋯」我伸手摸到放喺一旁嘅手機將鬧鐘㩒熄，「熄咗啦⋯」





我琴晚，同阿立一齊瞓，喺佢間房⋯只係琴晚一齊瞓，冇發生其他任何有可能會導致懷孕嘅事⋯

阿立一個轉身，由平瞓變成側身面向我瞓，佢嘅手放喺我嘅頸下比我枕住，佢隻手應該痺晒⋯

我望住佢嘅睡顏，已經好耐冇喺咁近嘅距離見到，心跳喺一朝早就加快咗跳動嘅節奏

蓋住同一張被、瞓喺同一張床、望住對方嘅睡顏⋯成件事係幾曖昧不明？

「頭髮都亂糟糟⋯」我抬眼望到佢嘅頭髮就忍唔住一笑，平視嘅時候仲可以見到喺佢膊頭近鎖骨嘅位置有一個喺情到濃時嘅時候留低嘅咬痕





平時阿立都幾注重外表，出街又好番工都好，一定會係乾淨整齊嘅形象行出去，喺外面基本上好難見到佢呢個形象

不過都係好事，只有我見到佢呢個毫無防備又慵懶嘅一面，有種因為我係佢親近嘅人嘅感覺

「佢間房好香⋯」我合起雙眼，嗅覺變得比開眼嘅時候強，「本人、床、枕頭、被鋪⋯空氣⋯味道好濃烈⋯」

「我起身啦，你起身未？」佢低聲問我，「食唔食早餐？」

「嗯⋯」我微微點頭，「想食老麥早餐⋯」





「好，我去買，你瞓多陣⋯」佢帶住床氣坐起身擰轉頭望一望我，然後就落床去咗廁所

記得琴晚瞓之前，阿立低聲問我：「如果同你一齊住嘅係其他男嘅，你會唔會都咁樣⋯？」

「講咩呀？我唔係啲咁隨便嘅人嚟。」我伸手握住拳頭，喺佢嘅心口打咗一拳，力度好細，根本係比棉花打一樣

「哎，點可能⋯」我睜開眼望住虛掩住嘅房門，伸長手摸向隔離空空如也但仍有餘溫嘅位置，「其他人嘅話，我根本唔會揀一齊住⋯」

喺聽到大門閂門嘅聲音之後，我先坐起身撥一撥頭髮，然後落地著拖鞋去廁所梳洗一下

「好明顯嘅牙印⋯」我企喺鏡前，拉開衫領，見到好清晰嘅牙印喺我嘅鎖骨上面

我嘅指腹輕落喺牙印上，可以感覺到凹凹凸凸嘅感覺

「呼⋯琴晚真係傻咗⋯」我望住鏡中嘅自己嘆氣，「雖然話感情嘅嘢控制唔到，但係喺咩關係都唔係嘅情況下⋯有啲離譜⋯」





如果同我一齊住嘅人唔係阿立，而係其他男仔，我真係絕對絕對唔會咁做⋯！

「宜家唔係就係差在未開口答應佢復合咩⋯？」我無奈咁問自己

放低⋯我根本就冇放低過，只要佢一出現，佢講一句，我再想扮嬲又好點都好，我用嚟偽裝嘅殼就會即時剝落

佢根本就完全將我拿捏住喺手心⋯同浩宜講嘅一樣，我真係比佢拿捏住，但係，我冇討厭呢種感覺

阿立對我嚟講係朋友、係初戀、係重要、係不可或缺、係過去⋯未來會唔會有佢⋯？我唔知道，但呢一刻係有佢

「我會唔會遇到比阿立更特別嘅人？」我曾經咁樣問過自己

但答案係唔會，因為心深處嘅我，根本就唔願意將嗰個特別嘅位置讓比阿立以外嘅人，我始終喺度為佢守住呢個位⋯





我梳洗完行入阿立嘅房拎番手機，將床鋪番整齊，將房嘅窗簾打開，等外面嘅陽光可以照到入嚟

喺我準備行出廳嘅時候，聽到鎖匙聲，阿立番嚟啦，我即刻出去開門

「買咗魚柳包餐比你，走咗醬㗎啦。」阿立直接行到枱前，將紙袋放喺枱上面，「幫你叫咗咖啡。」

我閂埋門，一步一步行到佢嘅身旁，莫名其妙咁就伸手攬住佢

「做咩咁突然？」阿立嘅語氣上冇太多嘅驚訝，只係好似平時嘅語氣一樣普通

感覺就好似我地已經係感情穩定，過咗熱戀期嘅情侶一樣平靜

「冇，我都唔知。」我如實作答

我同佢默默咁對望，阿立定睛望住我嘅時候，我喺佢清晰嘅雙眸中可以見到自己嘅身影





「嗰陣你話唔再中意我，對我冇feel啦⋯係唔係大話嚟⋯？」我側住頭將額角靠喺佢嘅膊頭，眼望住佢將紙袋摵開

「哦？終於發現啦？」佢輕輕一笑

「你講得太絕，冇心思去諗多啲，想再問嘅時候，你已經搬走咗。」我平靜咁回答

「我宜家答你，我的確係因為嬲你話我唔重要所以咁講，而且你有好多選擇。」阿立轉身過嚟面對住我，伸手撥我嘅頭髮

「以後⋯唔準再咁講咁諗啦⋯」我嘅雙手輕輕咁喺佢嘅身後交疊將佢攬住，佢嘅身上有陽光嘅味道

「你呀⋯」阿立輕笑一聲，我有啲困惑咁抬起頭望佢，佢伸手將我嘅下巴托起，強制我抬起頭同佢對望，「你真係識吊我癮，講咁多承諾，但就係唔答最重要嗰句。」

「同你好識拿捏我一樣囉～」我鬆開手行去拉開櫈坐低，搶先一步開始食早餐





「又關我事啦？」阿立無語咁笑一笑，然後坐低喺我對面嘅位置同我一齊食早餐

琴晚情不自禁嘅熱吻，今朝早嘅我地又好似冇事發生一樣，明明鎖骨上仍然留有對方留下嘅痕跡，但大家又若無其事一樣

「以後都信你，只要你講我係重要，我就信你。」阿立忽然間開口答我，正要開口咬薯餅嘅我愣咗一下，然後抬頭望佢，「只要係你講，我都—」

「許翊瑜！」我打斷咗佢嘅後半句，佢眨一下眼凝視我，等待我即將要講嘅說話，「你係重要，當年係誤會，你係重要㗎，唔好再誤會啦。」

阿立先係愣住，好似要花少少時間將我講嘅說話完整消化，兩秒之後嘅佢露出淺而滿足嘅笑容：「自己講咗咩記住啦。」

我同阿立冇提起復合嘅問題，都唔係真係完全吊住對方，只係有啲說話未到可以講出口嘅時機？但我覺得我地係有共識嘅

⋯

最近cafe又忙番啲，大概真係同天氣有關係，天氣好啲嘅話，嚟cafe嘅人又會多啲

朝早有我同樂恩加埋阿逸一齊做開店準備，我同阿逸已經冇咁尷尬，都係同以前一樣咁相處

大家成年人，都唔想搞到關係太僵，所以都會保留番最後嘅體面比大家

「知珩，你食唔食？」樂恩今日拎住早餐番嚟食，坐喺吧枱食嘅時候忽然間拎住一份三文治遞比我

「唔啦，食咗早餐。」我搖搖頭就拒絕，然後望向廚房嘅方向，阿逸啱啱好行出嚟，「你問下阿逸？」

「哦。」樂恩點點頭，拎住三文治、帶住微笑望向阿逸嘅方向，「你食咗早餐未呀？」




IG Link: https://www.instagram.com/nd_cotttoncandy/?hl=zh-tw