【愛情】關於我一覺瞓醒發現喺初戀屋企⋯！: 98. 偶遇
「你問下阿逸啦～」我邊做嘢邊低聲講道，「你問佢嘅話佢應該會去，而且你唔係主要係想問佢咩？」
「你、你點知㗎⋯！？」樂恩慌張咁瞪大眼望住我問道，然後又望向廚房睇下阿逸有冇行出嚟
「你望咗廚房好多次啦，而且你好明顯呀⋯」我無奈咁對樂恩笑道，喺佢耳邊又道：「你唔係中意佢？」
「你連呢個都睇得出！？」樂恩更加震驚，拎住塊抹枱布抹嚟抹去，但都係抹緊同一個位置，「我有咁明顯咩？」
「有呀⋯」我微微點頭
「咁點算呀？」樂恩忽然問咗我一句，我比佢突然間嚟嘅問題搞到窒咗一窒，「我點開口同佢講好呀？」
「你指約食飯？定⋯」我有啲唔肯定佢指邊一件事
「梗係食飯啦⋯！我冇心理準備要同佢講住⋯」樂恩輕皺起眉頭，有啲苦惱咁講，「不過，佢好好，對我嚟講⋯」
「呢樣嘢我唔否認，佢係好。」我微微點頭
「不過喺你心目中應該有更好嘅人啦⋯」樂恩望向我微笑，佢知道阿逸中意我，亦知道我唔中意阿逸
「嗯，係呀⋯」我嘅腦海中即刻浮現出阿立嘅身影，諗起佢都會會心微笑
「既然你咁講，我就放心去馬啦！」樂恩對我敬個禮
「你唔洗介意我。」我無奈一笑，「中意就去，唔好比自己後悔嘅機會。」
「好！等我去問下！」樂恩深呼吸一口氣，然後急步行出水吧行去廚房
心入面忽然間諗起阿立，好想快啲收工番去見佢，好耐冇試過有咁強烈嘅記掛感，好想攬下佢⋯
終於等到收工嘅時間，我好識做咁快手執好嘢就走，同樂恩對望一眼，樂恩比咗個Okay手勢我
「我走先啦～拜拜～」我識做咁先行一步離開cafe
我都要快啲番屋企食飯，阿立話佢今晚煮咗飯，我不禁加快腳步走向地鐵站，好想快啲番去食飯同見佢⋯！
⋯
⋯
⋯
「卓思齊你唔好掛住睇手機得唔得呀？難得做完份group project食餐好⋯」趙梓穎坐喺我隔離抱怨
「你最近做咩機不離手？」阿銘都開始喺度八卦
「我鬼有機不離手呀。」我見到佢仲未覆我message，於是鎖咗手機收起先，「收埋手機啦。」
「有囉，你最近連食飯都淨係望住手機！」思淼大聲咁講出嚟，好似要舉報我咁
「識咗女朋友呀？咩樣㗎？」阿銘將我嘅手機㩒低，「睇下睇下。」
「冇女朋友呀，我都想睇個手機就有。」我無奈咁將佢隻手推開
我只係等緊人覆我message，自從上次食完飯都冇見過佢，好彩有IG，對話嘅開始都係我先主動
我只係有啲怕同佢斷咗聯繫⋯始終，佢係出咗嚟社會工作嘅人，我仲係大學生，話題好似唔會有太多⋯
咁啱我感覺到手機震咗一下，下意識就即刻立刻馬上拎手機出嚟，我唔想miss咗佢嘅message
「嘖嘖嘖⋯」趙梓穎微微傾向我，我都可以感受到佢喺度偷瞄我嘅手機屏幕，不過好彩我用防偷窺mon貼
真係佢覆我！好彩我有拎手機出嚟睇，差啲就要miss咗佢嘅message
浩宜淨係send咗張圖過嚟，因為我問佢今晚食咩，我㩒開張圖，見到佢影住喺面前嘅半個金色火鍋
「我今晚都係打邊爐，做完份group project慶祝下」我影咗張相回覆佢
「你喺邊度食」佢忽然問我
「尖沙咀」我好快咁就回覆佢
我望住佢typing緊，有少少緊張，每次見到佢打緊字我都會自動咁心跳加速，好緊張唔知佢會答啲咩
「我都喺尖沙咀，好似喺同一間？」我望到佢send過嚟嘅message訝異咁瞪大眼
我即刻坐直個人擰轉頭東張西望，睇下佢喺邊一邊
「搞咩？」思淼望住我，「有熟人？」
望到自助區嘅時候，我一眼就望到夾緊嘢食嘅浩宜，我想起身，但又覺得佢地實望住我問我做咩
「你地洗唔洗食啲咩丸嗰啲呀？」我有啲焦急咁問，我怕我遲咗一步，浩宜就番咗去，「我去攞。」
「哦都好呀～」阿銘第一個點頭講好，唔洗佢拎就咩都好好好
「隨便夾啲番嚟啦唔該～」思淼即刻抬頭滿臉誠懇，「趙梓穎食唔食？」
「哦好呀～咩都得。」趙梓穎望住準備企起身嘅我，「要唔要幫你手？」
「唔洗唔洗！我去就得啦。」我連忙搖頭示意唔洗，唔等佢地再講啲咩就起身行出去
我行到浩宜嘅身後，佢似乎掛住夾嘢冇留意到身後企咗一個人，我伸手輕輕咁拍一拍佢，喺佢擰轉頭嘅同時探頭望佢
「嗨～」我主動咁同佢打招呼
「你喺度嘅？我地真係喺同一間餐廳食飯。」浩宜見到係我，臉上露出開朗嘅笑容
「我地咁有緣嘅⋯？」我小心翼翼咁帶住微笑問，雙眼一直關注住佢嘅表情
「係囉～」佢睇起嚟冇特別反感，可愛咁側一側頭，對我笑一笑講道
佢一側頭，我都覺得自己有種心花怒放嘅感覺，生得靚都算，同呢種可愛動作完全冇違和感，真係太完美
「你食咩呀？幫你夾？」佢左手攬住碗，右手拎住鐵夾，推開膠盒嘅蓋
「唔洗，我自己可以啦⋯」我發現我望住佢嘅時間太長，因為唔好意思所以就移開視線
再行咗兩轉，佢拎住兩碗丸類、生菜，然後又想拎嘢飲；佢企喺放滿飲各種茶嘅雪櫃前面思考，似乎猶疑緊要唔要一次過拎埋嘢飲
「我幫你拎番去呀～你拎埋嘢飲⋯」我主動伸手接過佢手上嘅兩個碗，等佢可以騰空一隻手出嚟拎嘢飲
「咁⋯麻煩你啦～」佢禮貌咁對我講道
唔麻煩，點會麻煩呢？幫到你係我嘅榮幸！我好想咁講，但咁樣講嘅話，意圖有啲太明顯
我拎住嘢跟喺佢身後行去佢坐嘅位置，佢今日原來同幾個同事一齊食飯，之所以認得係同事，係因為上次我喺佢公司樓下等佢嘅時候，見到佢地一齊出嚟
IG Link: https://www.instagram.com/nd_cotttoncandy/?hl=zh-tw