【愛情】關於我一覺瞓醒發現喺初戀屋企⋯！: 101. 請你心疼

「你嘅年齡大過我，但唔好做呢啲咁幼稚嘅事唔該，你比浩宜飛係你抵死，一腳踏幾船。」我挺直腰板企好，用不屑嘅眼神望佢，「仲有面番嚟叫浩宜同番你一齊？你唔覺得好好笑？你憑咩？憑你有幾個心分比其他人？」

佢比我講到惱羞成怒，一手就捉起我嘅衫領，睇下睇下，佢又嚟啦，又想出手啦⋯

我今次唔係好似啱啱咁冇預備，我今次準備好，所以我好利落咁送一個過肩摔比佢，好彩細個嗰陣有學下柔道旁身⋯

「呀嘶！」佢比我一下撻喺地下，即刻一臉痛苦

瞓喺地下嘅佢同企喺度嘅我對望，睇起嚟好似我高高在上望住佢一樣，佢迅速企起身，大概係覺得比我落咗面，又或者覺得地下太污糟啦





佢望住我嘅表情怨氣極重，但又唔咁再上前對我郁手郁腳，不過我都只係出於自衛反擊，邊個叫佢突然打人在先？

「真係莫名其妙。」我無奈咁講道，「淨係識郁手郁腳，難怪浩宜要飛你，一腳踏幾船仲覺得自己冇問題，仲要怪人唔同你復合⋯借開。」

我將佢一手撥開，等佢唔好擋住喺我面前阻住晒，我同呢啲人真係溝通唔嚟，真係溝通唔嚟，做嘅嘢都唔係一般人可以理解嘅嘢嚟

「嘖⋯」我拎起手機，用手機嘅倒影照一照，都唔洗番去照鏡都知瘀硬，「癲佬⋯」

⋯





第二日我唔洗番學，既然唔洗番學，咁我今日番工啦

「叮鈴鈴鈴～」cafe嘅門鈴喺我推門嘅一刻響起嚟

「早晨呀卓卓～好耐冇見啦～」我望住樂恩坐喺吧枱食緊早餐

「早晨。」喺水吧嘅知珩聽到門鈴就抬頭望過嚟

「嘩！卓思齊！你塊面做咩瘀咗咁大撻！？」樂恩眼力好，一眼就望到我面上嘅青紫色





「你同邊個打交嚟？」知珩輕皺起眉頭

「冇嘢冇嘢。」我搖搖頭，然後就直行入更衣室

我行出休息室嘅時候，樂恩啱啱好行入廚房，我行去水吧，知珩將我打量一下

「你做咩打交呀？」知珩耷低頭做嘢嘅時候問我

「唔係打交，係比人打。」我無奈咁回答知珩

「比邊個打？」知珩滿臉訝異

「浩宜個ex⋯」我用無奈嘅聲線低聲道，知珩似乎有啲迷惘，唔太肯定我講緊咩，我補充道：「一腳踏幾船嗰個⋯」

「哦～」知珩一副恍然大悟嘅樣，「你識佢？」





我將嗰日嘅事大概咁講咗比知珩聽，但知珩似乎冇覺得好意外，只係點點頭

「佢都幾唔知醜⋯」知珩最後比嘅評價，大概係知珩早知道呢個人嘅存在，「佢真係除咗用郁手郁腳呢招之外冇其他招數。」

「佢誤會咗我係浩宜男朋友⋯」我講道

「浩宜知唔知你撞到佢然後比佢打？」知珩問我

「唔知，我冇同佢講。」我連忙搖頭，「浩宜好似好憎嗰個人⋯」

「唔⋯曾經愛過，不過佢一腳踏幾船比浩宜發現咗之後，佢地就分手，浩宜就好討厭佢。」知珩解釋比我聽，「浩宜係敢愛敢恨嘅人嚟，對於對佢唔住嘅人，一概都係呢個下場。」

「哦⋯敢愛敢恨都好呀，總好過暗戀一個人十年八載⋯」我伸手打開吊櫃嘅門，拎咗一筒新嘅外賣杯落嚟





「浩宜都多人追㗎，差在邊個入佢眼。」知珩講嘅嘢同前面有啲九唔搭八，我準備閂櫃門嘅人定咗一下

知珩行過我身邊要行出水吧嘅時候，伸手拍咗我膊頭兩下，但咩都冇講，但我可以感到佢嘅意思，就係佢知我中意浩宜嘅意思

我一直帶住面上嘅痛感番一日工，忙到都唔記得咗面好痛

⋯

收工時間

我正要拉門行出cafe嘅時候，浩宜準備推門行入cafe

又會呢個時間嚟嘅⋯？但cafe夠鐘閂門

「你點解過嚟嘅？」我訝異咁望住眼前嘅浩宜





「知珩叫我過嚟⋯」浩宜企喺門邊探頭入嚟望知珩，「知珩！」

「你嚟啦？」知珩企喺洗手盆前擰轉頭過嚟望浩宜

知珩將濕漉漉嘅手用身上嘅圍裙抹乾，行出水吧到門前，一手將浩宜拉咗入嚟，另一隻手捉住我嘅手肘

「你睇下你個ex將我地cafe門面打到咩樣？」知珩指住我瘀咗咗面

「咩事呀⋯！？」浩宜嘅視線沿住知珩嘅指尖望去，見到我面上嘅瘀傷，即刻瞪大眼，「佢搵你？」

「咁啱撞到，然後佢就一拳打過嚟，我反應唔切⋯」我擺出委屈嘅表情道

知珩偷偷地瞄我一眼，然後默默咁行開咗少少





「嘖，淨係識郁手郁腳。」浩宜嘅雙眸中係滿滿嘅不悅，望我嘅眼神又柔和幾分，「痛唔痛呀？」

浩宜伸手輕輕咁戳咗我瘀咗嘅位一下，我即刻好配合咁「嘶！」一聲，知珩比機會我，我當然要好好把握

「佢以為我係你男朋友，咩都唔講就衝上嚟打人⋯」我又委屈咁抱怨，望住浩宜有啲心痛嘅眼神，我心入面暗自高興

「下次唔好理佢啦⋯！」浩宜講道

「佢又嚟搵番你呀？」知珩問浩宜

「係呀⋯煩死人，佢真係好厚面皮，面皮冇成呎厚都做唔出。」浩宜滿臉嫌棄，然後望向我，「你係唔係收工？」

「係呀。」我遲疑咁點頭

「姐姐帶你去食好嘢！」浩宜伸手拍一拍我膊頭，「畢竟都算係我搞到係比人打⋯定你要番屋企食？」




IG Link: https://www.instagram.com/nd_cotttoncandy/?hl=zh-tw