【愛情】關於我一覺瞓醒發現喺初戀屋企⋯！: 105. 引人暇想

「我都淨係開過一次。」我盤腿而坐，小心咁將盒裝左右向上郁小小郁小小咁打開，「歷史遺物。」

「有一大疊聖誕卡⋯有相⋯有我送嘅禮物⋯有張提你唔好飲凍嘢嘅memo⋯」阿立坐喺我身旁拎出鐵盒中嘅嘢，「我以為你會將隻手鐲都擺埋入去。」

「所以我話你太少行入我房，都冇留意到嗰隻手鐲放咗喺我枱面。」我將頭靠喺佢嘅膊頭上面，望住佢睇我鐵盒入面嘅嘢，「有一次我番嚟嘅時候拎咗出嚟帶咗番去。」

「睇嚟真係太少入你房。」阿立望一望我

我偷偷觀察住佢睇相嘅反應，我同佢分手之後，我將一切同佢有關嘅嘢都收起晒，相都比我一張不留咁收起





我望住相中嘅自己同佢，好清澀嘅愛情⋯心入面有啲感慨，分開過先會更堅定咁走向對方

七年，喺我見番佢之後，我都冇回想過嗰七年我係點過，唔係冇咗佢唔得，而係冇咗佢，做所有嘢都會少咗一份快樂

我悄然用手翹住佢嘅手，指尖沿住佢嘅前臂向前，掃過佢嘅手心，將佢嘅手握住

「李知珩，我地好好彩。」阿立望住手中嘅一疊相，忽然低聲對我講道，「見番都可以有嗰份感情喺度。」

「嗯⋯我都覺得係好好彩⋯」我微微點頭笑道，心入面係講唔出嘅感慨，「可能，個天覺得我地分開夠啦，要比個機會我地一齊番⋯」





「你打算幾時同阿姨講，你同我一齊住？」阿立問我

「搵個時間⋯要搵個啱嘅時間先同到佢講。」我不禁有啲緊張，我唔太敢去想像我媽知道嗰陣會係咩反應，「不過遲早都要同佢講⋯」

唔⋯主要係我怕我爸媽會嬲，連累阿立一齊比佢地嬲⋯我要用咩解釋好⋯？直接同我媽講靖佑甩我底又好似，唔太好⋯

喺食飯嘅時候，我一直偷偷地睇我媽面色，我諗緊要點樣開口講⋯好緊張，心臟噗噗跳⋯！

我望住大家嘅氣氛好融洽，我諗我講完，佢地應該唔會嬲⋯？媽咪爸爸都幾中意阿立呀，佢地又支持我同阿立一齊⋯





「唔⋯」我先係自己默默咁開一開聲，然後偷望我媽一眼

「琴晚套劇唔係講到—」「媽咪，我有嘢想講⋯」

我講嘅時候，覺得自己手心都出晒汗，只要我一放低個碗同筷子，我隻手應該會好明顯咁喺度震

「你咪講。」我媽用一個莫名其妙嘅樣望住我

本來傾緊計嘅大家，喺我一開口嘅瞬間即刻靜咗落嚟

「其實係咁嘅⋯」我嘅目光都唔敢停留喺我媽身上太耐，因為心虛所以就耷低頭，「呃⋯我宜家就冇同靖佑一齊住，我宜家就搬咗去同阿立一齊住⋯」

我講完最重要嗰段之後頭都唔敢抬一下，好怕見到我媽嘅反應，好怕佢黑晒面⋯

我見大家都冇出聲，就偷偷地抬眼望下媽咪咩反應，點知，媽咪一臉平靜咁食飯





「媽咪？」我有啲怯咁叫一聲媽咪

「嗯，好呀，一齊住咪一齊住。」媽咪點點頭，佢嘅反應比我想像中平淡，「我要提你嘅都提晒你，你自己知道、安排好自己就得啦，你咁大個人啦，唔通我仲可以綁住你喺屋企咩？」

「哦，多謝媽咪～」我即刻笑笑口道，媽咪嘅反應係我意料之外嘅事

媽咪只係無奈咁搖搖頭，果然知我者莫若母，不過佢冇反對就得啦

媽咪喺我細個嘅時候就同我講明，佢唔會一直管住我呢樣嗰樣，喺適當嘅時候放手比我去試，都係對我嘅一種成長同磨練

食完飯再坐多陣我地就準備番屋企，喺準備起身走嘅時候，我打算去廚房通知阿立一聲

「樓下03室個王姨，佢個女都結咗婚啦，細個你地成日都一齊喺樓下公園玩。」我行到廚房門口聽到我媽講，我好似係反射動作一樣即刻行埋一邊匿埋，「你地呀，個個都大得咁快。」





阿立似乎唔知講啲咩好，只係笑一笑

媽咪真係呀⋯聽起嚟好似逼婚咁，樓下王姨個女結咗婚呢句一啲關係都冇⋯阿立聽唔出就假

「我冇好直接咁同知珩提過呢樣嘢⋯」阿立果然聽出我媽咪嘅意思，知道佢想暗示結婚嘅意思，「但我係有打算，不過都等佢考慮好先；再一齊多一段時間，等佢安心啲先，唔知係唔係我當時搬得太急又同佢斷晒聯繫，佢好似都係有啲擔心。」

我不禁屏住呼吸，阿立有考慮到咁長遠嘅事我知道，「以後都一直喺埋一齊」唔係就係呢個意思⋯？

「你呀，太了解佢⋯」我偷偷探頭望一眼，見到媽咪拍一拍阿立嘅膊頭，「知珩有時講嘢好婉轉，就要你咁了解佢先知佢想點。」

「阿立，番去啦？」我終於行出一步踏入廚房，企喺阿立嘅身旁

「哦好呀。」阿立微微頷首，「阿姨，咁我地番去先啦。」

「媽咪，咁我地番去先啦～」我攬一下媽咪，然後就轉身出去著鞋





一行出走廊，我即刻拉住阿立好奇咁問下：「你啱啱同媽咪喺廚房講咗咩呀？」

「講你壞話囉～」阿立笑道，手輕輕拍咗我嘅額頭一下

「好囉～」我冇再追問落去

我同阿立行出大堂，我地經過以前放學嘅常駐地公園，經過公園再行出去，感覺就好似咩都冇變一樣，一樣係同一個公園，一樣係我同佢兩個人

呢段路係放學番嚟嘅必經之路，我同阿立放學之後一定會行呢度番屋企，感覺同以前有啲相似又有啲唔一樣，情緒有啲複雜

「估唔到仲有機會可以同你一齊行呢條路⋯」我心入面有啲感慨，但仍然以笑容講出呢句說話，我望住佢嘅側臉道：「再見嘅感覺好好，有種失而復得嘅感覺。」

「我都有諗過再見嘅時候，我地會係點，但原來都冇咩改變，嗰種感覺好安心。」阿立嘅手牢固咁將我嘅手拖實，「不過知你有人追，都會好不安。」





我曾經有諗過，到底今世要回眸幾多次，先可以換多一次再見嘅機會？

「係？李小姐請。」阿立察覺到我一直定睛望住佢

「想望多你幾眼。」我好坦白咁望，阿立不解咁挑起眉表示佢嘅困惑，我拉住佢，佢彎腰遷就我將耳仔湊近：「望多你幾次，等下世都可以再見你。」

「你幾時識講肉麻嘢？」阿立滿臉震驚咁望住我，好似啱啱嗰句唔係由我把口出嚟一樣

我冇答佢，只係笑住咁一下將佢攬住，雙手攬住佢嘅腰，頭靠喺佢嘅頸窩，再加上阿立嘅回擁，好有安全感

阿立耷低頭想錫我，我即刻好快咁提手擋喺佢嘅唇前，阿立輕皺一下眉頭

「唔比錫？」阿立低聲不滿咁問我

「唔係⋯不過番屋企先⋯」我抿一下唇，帶住微微上揚嘅嘴角柔聲道

我講完先發現，呢句說話引人暇想嘅程度大概大過上次朝早po喺story嘅刷牙相




IG Link: https://www.instagram.com/nd_cotttoncandy/?hl=zh-tw