【愛情】關於我一覺瞓醒發現喺初戀屋企⋯！: 107. 假裝的
「係咪食嘢呀⋯？」阿銘坐起身，一個未瞓醒晒嘅樣，「晏晝冇堂⋯」
「我約咗人食lunch。」我望一望時間，即刻起身執好晒嘢準備孭背囊走
「吓⋯？你又約咗人食飯呀？」我都唔理阿銘同趙梓穎講咩，孭起袋就走
今日約咗浩宜，我又點可以遲到呢？我怕我會遲過佢要佢等，所以我係跑住去
離餐廳仲有一條馬路嘅時候，我已經見到浩宜行入餐廳，我即刻加步腳步跑過去，跑入餐廳跑時候即刻望下浩宜坐邊
浩宜似乎都見到我搵緊佢，提手對我揮一揮，我小跑過去喺佢對面坐低，感覺要透多幾啖大氣先可以回到氣
「唔洗急，我都係啱啱到～」浩宜托住下巴對我微笑，將放喺手邊嘅水杯放到我面前，「飲啖水先啦～」
我拎起水杯咕嚕咕嚕咁就飲水，一次過飲晒成杯，浩宜一直帶住少許嘅笑意安靜咁望住我
「呃⋯做咩⋯？」我比佢望到有啲唔好意思
「好似每一次同我食飯，你都係跑住嚟。」浩宜微微一笑
「我唔想你等太耐嘛，明明係我約你，但要你等我唔係幾好嘅⋯」我解釋道，「而且你陣間仲要番工，我遲到嘅話你食飯休息嘅時間又會少咗⋯」
「你都真係幾貼心啵～」浩宜笑道，伸手拎起啱啱送到嚟嘅凍咖啡，「你塊面都差唔多散晒瘀啦。」
「嗯，冇咁痛冇咁瘀啦。」我伸手摸一摸自己嘅顴骨位置，「係呢，嗰個人仲有冇搵你⋯？」
「呢幾日都冇—」
浩宜嘅說話都未講完，放喺手邊嘅手機就響起嚟，浩宜望咗手機一眼然後滿臉無奈咁望向我：「宜家有啦⋯」
「唔好聽。」我輕皺一下眉頭阻止浩宜，浩宜頓時㩒咗鎖機收線
「真係一講曹操曹操就到⋯」浩宜嫌棄咁拎起浸喺水入面嘅匙羹，匙羹望開水杯唔夠兩秒，浩宜嘅手機又響，「又到⋯嘖⋯」
今次，浩宜唔耐煩咁聽咗電話，表情都變到超唔耐煩超嫌棄⋯
「喂？點呀？煩唔煩？」
「有病係唔係？你係聽唔明人地講嘢定有咩障礙？你比人飛關我咩事？」
呢個人嘅邏輯好神奇，講唔出點樣神奇，大概係佢講嘅嘢會令你有種「哦～」然後刷新三觀嘅感覺
「你當我資源回收筒呀？我唔收垃圾。」
「我日日都唔得閒亦冇嘢要同你傾⋯你係唔係聽唔明人地講嘢啫？」
佢嘅前男友真係一個好神奇嘅人，完全聽唔明人話嗰種⋯
我嘅餘光忽然望到有人企咗喺我地坐嘅卡位嘅窗外，我望出去，嗰個神奇男人幾時喺度⋯！？嚇到我心都離一離
正當我準備叫浩宜嘅時候，似乎神奇男人已經先一步叫浩宜望出去，浩宜擰轉頭望嘅時候不禁瞪大眼，表情同我一樣
神奇男人大步咁向前行，我有預感佢會行入嚟講廢話，我即刻起身行到浩宜隔離坐低
浩宜望一望我冇講嘢，因為佢真係行入嚟餐廳⋯真係癲佬嚟⋯
「嗨～」佢好自然咁就坐咗喺我同浩宜對面嘅位置，我冇理佢，只係將我個飯由對面拉番過嚟，「又見面啦。」
我望佢一眼，都懶得理佢⋯講到好似我同佢好熟咁⋯
「浩宜～」佢一手托住頭，一手對浩宜揮揮手，「嗨～」
浩宜當冇聽到，對面嘅人見浩宜唔理佢，佢直接叫人過嚟落單，打算坐喺我地對面一齊食飯
比起比佢坐浩宜隔離，我寧願佢坐對面⋯唔想佢離浩宜太近
「男朋友咁好特登落嚟同你食飯呀？」我唔望佢都感覺到佢望住我
「知就好，唔好阻住晒。」浩宜回答佢，「你上次打我男朋友我都未同你計。」
「佢上次有還手打我，佢冇同你講咩？」佢表情得意咁講，我有啲緊張咁望浩宜一眼
「Sorry，我男朋友唔會郁手打人，唔似你淨係識郁手郁腳咁粗魯。」浩宜微笑反駁
雖然唔係完全係真實嘅事，就算只係一個為咗避開麻煩嘅謊言而有嘅「男朋友」，但聽到佢堅定咁企喺我呢邊，我覺得好開心但又好冇實感
「浩宜，你快啲食嘢先啦，我陣間送你番公司。」我貼心咁對浩宜講道，「難得lunch可以休息，你唔好嘥精神喺啲無謂人度啦～」
「嗯，好啦～」浩宜知我嘅用意，即刻微笑點頭
我同浩宜一食完，就即刻埋單走，好彩啱啱我地講咗同嗰個人分單
我將浩宜送到番公司樓下，喺佢要轉身番去商業大廈嘅時候，佢嘅目光忽然定一定落喺我身後，然後雙手攬住我
「佢喺後面，你陣間番去小心啲。」浩宜攬住我嘅時候低聲講道
「嗯，知啦。」我點點頭，「如果佢又嚟煩你，你記得同我講⋯！」
「你呢個「男朋友」真係似模似樣啵～」浩宜笑起嚟嘅時候特別甜，可惜我唔係真係佢男朋友
「咁梗係啦⋯！」我壓抑住心入面嘅興奮，以理所當然嘅語氣回答佢，「我係你⋯「男朋友」嚟㗎嘛！」
我嘅一句，令浩宜笑容常開，我可以令佢成日都咁開心，係唔係都可以有分加？
「好啦，咁我番去做嘢啦～」浩宜對我揮揮手，喺佢回眸望我嘅時候對我笑道：「「男朋友」拜拜～」
佢呢句拜拜真係甜到入我心深處⋯！我一定要趁呢段時間好好表現！
不過自從今日呢次見面開始，我同浩宜嘅聯絡好似都愈嚟愈多，好似又熟咗好多
傾計嘅次數都多咗好多，喺夜晚都會傾好一陣，朝早嘅時候就偶爾一兩句啦～可以變得更熟絡似乎都係一個好嘅狀態
⋯
「唔該～」我嘅餘光見到有人行到去收銀處，我自動咁邊睇手機邊行去收銀處
「咦？係你呀？」我一抬起頭就見到趙梓穎企喺收銀處前
「係呀～嚟探你班呀～」趙梓穎翹埋雙手笑道
IG Link: https://www.instagram.com/nd_cotttoncandy/?hl=zh-tw