【愛情】關於我一覺瞓醒發現喺初戀屋企⋯！: 112. 節制
對佢，係無法停止同抑制嘅心動，無辦法唔去想像同期待我地嘅未來，好似只有對佢，我先會無法自控咁去想像未來
「又偷笑又偷笑！又笑咩呀？」阿立好快就察覺到我上揚嘅嘴角
「笑你～」我挽住佢嘅手臂、靠住佢嘅膊頭，「都係要係你，所有嘢先有意義。」
我地冇太多刻骨銘心嘅過去，只有初戀留落嚟嘅感情；冇感情會一直停留喺熱戀期，但只有同佢一齊，我會覺得所有事都係歷久常新⋯
⋯
溫熱嘅感覺又鎖骨逐漸擴散到耳垂、到臉頰、到唇⋯好窒息但係唔想停止⋯
佢高大嘅身影將我完全籠罩，只要佢彎腰壓向我，我嘅眼前就只有佢啦⋯
房內嘅呼吸聲變亂，交織一齊嘅呼吸聲令空氣變到好香甜，唔知道係邊個經唔起邊個嘅誘惑⋯
「等、等陣⋯！」有種有氣無力嘅感覺傳嚟，我雙腳都要冇力，「抱⋯」
「攬實。」阿立低聲道，下一個瞬間我已經雙腳離地，將我嘅雙腳卡喺佢嘅腰間
阿立抱住我轉咗身，向前行咗三步，將我放咗喺床上；我雙手仍然環抱住佢嘅頸，喺佢放低我嘅時候佢順勢彎低腰，雙手㩒住床借力
我嘅指尖由佢嘅後頸輕輕掃到膊頭，我覺得自己愈嚟愈唔知道要節制⋯
佢嘅手繞到我嘅背，由背移到腰，清晰咁感覺到佢用手心托住我嘅腰然後毫不留情咁向我壓落嚟
我瞓低喺柔軟嘅床上面，同佢一齊番之後完全冇節制過，咁樣似乎唔係好事，但又夾雜住少少嘅優點⋯
「許翊瑜，節制啲得唔得？」我一臉認真咁推住佢問道，然後用指尖撥開佢嘅衫領，「舊嘅痕跡仲喺度未散晒～」
佢耷低頭朝自己嘅衫領望一眼之後望向我，伸手撥開我嘅衫領，沉默一秒過後低聲對我講咗句：「就中意同你咁冇節制。」
「你真係離譜⋯！」我一時失笑，伸手輕打佢一下，「可以咁㗎咩？」
「以前仲唔夠節制咩？人會變㗎嘛。」阿立理直氣壯咁反駁我
「咁以前點同？我地一齊嘅時候仲係學生。」我無奈咁回答佢，「有你咁計㗎咩？」
「有呀，以前又冇得放肆，宜家有啦又唔比⋯唉～」阿立嘆氣坐起身，扁起嘴滿臉委屈，好似我恰佢咁，「果然輕易到手嘅嘢冇人珍惜啦⋯」
瞓喺床上面嘅我坐起身，望住佢委屈嘅一人戲就想笑出嚟，佢有時都太可愛啦掛？
「你睇你仲笑！我都知㗎啦！」阿立唔高興咁皺住眉
「冇～」我坐近佢攬實佢，靠住佢嘅膊頭側側頭望佢，「你都係咁重要，我都係咁重視，都係最中意你。」
「嗯。」阿立低聲嗯一聲，聽起嚟冇唔開心，佢都滿意我呢個答案
「宜家同你一齊住好開心，日日都可以見住你，番工再辛苦都唔怕⋯」我喺佢臉頰上錫一啖，伸手摸一摸佢嘅頭髮，「係唔係一定要人講到咁出面？」
「咁有時聽下又唔係壞事。」阿立微微側身攬住我向後灘，我好親密咁依偎喺佢懷中，「你做女仔嘅要人氹，我做男仔嘅就唔洗人氹？」
「氹～」我乖巧咁點頭，「許翊瑜⋯」
「咩呀？」阿立一手將我抱起，我都未反應得切已經將阿立壓咗喺我身下，「叫我全名做咩呀？」
「冇，就係想叫下你全名～」我雙手搭喺佢嘅膊頭上，低頭用唇喺佢嘅頸上輕輕掂咗一下
「中意叫全名嘅話，陣間好多機會比你叫⋯」阿立抱起我之後只係低聲咁講咗一句
我諗我，大概可以直接睇到聽朝早嘅日出⋯
⋯
「嘟嘟嘟嘟！嘟嘟嘟嘟！嘟嘟嘟—」
我先一步睜開眼起身去閂鬧鐘，仲係好想瞓覺，眼皮完全冇力撐開⋯
「好眼瞓⋯」阿立坐起身，「我先瞓咗3個鐘⋯」
「得你係咩⋯檢討下原因啦許翊瑜⋯」我側身扁起嘴，伸手攬住佢，「明知道今日仲要番工⋯」
我先一步掀開被落地，打開房門行去廁所沉面刷牙，轉個頭又準備番工
「唉～如果唔係要供樓又要娶老婆，我真係唔想番工⋯」阿立邊抱怨邊將啱啱拎出嚟嘅T-shirt著上身，「請假喺屋企補眠都好⋯」
「哦～娶邊個做老婆呀？」我瞬間捉住重點
阿立大步走向我，伸手掐住我兩邊嘅臉頰，我嘅嘴微微嘟起，佢耷低頭，用佢嘅唇輕輕咁掂咗我嘅唇一下：「娶你呀。」
佢自顧自講完就鬆開手，伸手拎牙膏牙刷，企喺我隔離對住鏡刷牙
唉～我真係好眼瞓，瞓咗3個鐘就要番工真係好難受⋯
⋯
「滋滋—滋滋—滋滋—」
我由1點開始就冇停過手，出單機隔離都已經擺定一卷新嘅紙
「知珩，做埋呢度呢啲可以去食飯啦。」阿逸由廚房行出嚟，經過水吧嘅時候順便道，「卓卓都係，做埋呢度去食飯。」
「Okay～」我點點頭
今日咁早食飯真係好，咁啱我都已經開始肚餓想食嘢，如果仲要等到2點幾先食飯，個肚都要餓扁⋯
做完手上仲有嘅單，我就準備去食飯；放飯放1個鐘，喺附近食嘅話時間都係夠有餘，當然，喺cafe食仲充足，不過難得食飯可以行開，就唔番喺度食
我同卓卓一齊食飯，都係喺附近茶餐廳食一個隨便嘅午餐
「你最近咁靜嘅？你番親嚟都好悶悶不樂。」我望住坐我對面嘅卓卓，佢成個人睇起嚟都散發住一種唔高興嘅氣場
「冇呀，只係唔想笑。」卓卓敷衍咁將嘴角撐起笑一笑
「呢排有冇約浩宜食飯呀？聽講佢好忙，成日都見客。」我偶然咁提起，前一排佢同浩宜好似都幾熟，成日都喺IG見到佢地一齊
「哦⋯冇，都好一排冇見過面⋯」卓卓嘅面色忽然間又沉咗啲，「應該，之後都⋯未必再見⋯」
「點解⋯？」一時之間我有啲不解，明明前嗰排佢地仲成日見
「唔⋯」卓卓扁一扁嘴，睇起嚟大概係發生咗咩事，「哎，唔知點講⋯佢婉拒咗我囉，我又唔想做到死纏爛打咁樣⋯我都想搵佢，但係，係囉～唔想佢覺得佢都暗示咗拒絕，我都仲要死心不惜咁纏住佢⋯」
IG Link: https://www.instagram.com/nd_cotttoncandy/?hl=zh-tw