【愛情】關於我一覺瞓醒發現喺初戀屋企⋯！: 116. 嚴肅與玩笑
「哦⋯漏咗隻USB喺休息室，今晚要交嗰份功課喺入面⋯」我一聽就認到係卓思齊把聲
我本來想當自己係一個普通嘅客人唔好去注意，但我咁樣諗嘅同時就擰轉頭望咗一眼，我同佢嘅視線對上，佢明顯咁愣咗一下，然後佢就當冇事發生咁移開視線
「睇下⋯冇得番轉頭啦⋯」我都當冇事一樣擰番轉坐番好，喺心入面冷笑一聲，「都算係我親手為呢段關係寫上句號⋯」
「拎完啦？」我聽到知珩問，大概係佢拎完嘢喺休息室行出嚟
「嗯，拎完啦。」我用餘光望佢，佢嘅語氣都好平淡，「我番去先啦，聽日見。」
「哦好呀，聽日見。」「叮鈴鈴鈴～」
「走咗啦⋯」我知道知珩係同緊我講
「嗯，咁咪走。」我緩緩抬起頭，淡然咁望知珩一眼
喺卓思齊走咗之後，我本來平靜嘅心境染上一層陰霾，心入面更鬱悶；我就唔可以好好咁面對自己嘅內心咩？但有咩好面對？就係一個朋友，唔再聯絡⋯
⋯
過咗大概一個星期，今個星期令人好煩躁，好多嘢要做，仲要落雨⋯煩死⋯
我討厭雨天，雨水打落地面再反彈上嚟嘅感覺令人覺得好難受，街上面會變到好逼，人地撞一下，我件衫都會濕⋯雨天令我好煩躁⋯
「唉⋯終於搞掂⋯」我望住終於做晒嘅文件鬆一口氣，但煩躁嘅情緒仍然環繞心頭
我嘅座位就喺窗外，我望向窗外，好似停咗雨啦⋯我都係趁佢落完雨快啲執嘢番屋企，番去煮個餐蛋麵都好，出前一丁係我嘅最愛
我行去搭地鐵番屋企，地鐵真係幾方便，比起巴士，我中意搭地鐵多啲，又快又方便
我行到去地鐵站出口嘅時候，見到好多人都企喺站內，我帶住不安嘅心側頭望一眼，果然又落起大雨啦⋯所以我討厭雨天就係咁解⋯
我今朝早出門口冇落雨，仲出猛太陽，所以我就放低咗把遮喺屋企冇拎，宜家落大雨係唔係玩我？
「我要一股作氣衝番屋企定等細雨啲先？」我望住密密麻麻嘅雨沉思，「咁大雨跑番去，應該會感冒⋯」
我行埋一邊，望住濕漉漉嘅地面就忍唔住覺得煩⋯幾時先細雨？細雨啲嘅話跑番屋企都唔係咩緊要事，至少唔會感冒先
最近好似諸事不順一樣，多嘢做到癲，連續嘅雨天，心情一直莫名咁繃緊住，連飲酒嘅心情都冇⋯好似好多嘢煩住我，但我又唔知有咩值得我去煩，出咗嚟做嘢，煩嘅嘢倍增⋯
「唉⋯如果卓思齊喺度就好⋯」我望住外面冇停過反而仲密咗嘅雨，莫名咁諗起佢
我點解會覺得佢喺度就好⋯？大概係我最近都冇見到佢，又或者只係慨嘆緊我同佢地曾經熟過，係惋惜嘅⋯
「一定係最近忙到傻咗啦⋯」我自嘲一樣笑住輕聲道
我又抬頭望向外面，雨未停而且好似愈嚟愈密，正當我收回視線，打算一鼓作氣衝番去嘅時候，卓思齊喺我面前出現
我同佢定睛凝視住對方，唔知仲以為睇緊電視劇，多年後重逢嗰種⋯佢將我由下而上打量一次，又望咗外面嘅雨一眼，行到我面前：「你冇帶遮？」
「嗯⋯」我有啲意外，但我好快就收起咗愕眼嘅眼神，尷尬咁點點頭，「番到嚟先落咁大雨⋯」
「唔介意嘅話，我可以遮你番去。」佢禮貌嘅一句，好似我同佢嘅更似陌生人
「麻煩你啦⋯」我點一點頭
佢先行出去開遮，然後將遮遞向我等我行出嚟，行番去嘅時候，佢一直將遮更傾向我呢一邊；我悄然抬頭望向佢，佢嘅雙眼一直直視前方，沉默咁向前行
佢同我之前識嘅佢好似係兩個人一樣，宜家嘅沉默冷漠完全唔係我當初識嘅佢⋯所以話，人同人之間嘅關係就係咁複雜⋯
「小心！」佢忽然一手就將我向後拉，我一秒回神，前面一架私家車駛過，「有車。」
「Sorry⋯」我個心都未平伏到落嚟，抬起頭發現我貼住佢企，大概係啱啱佢突然拉我，我企唔穩
「呢個位得斑馬線冇紅綠燈，小心啲。」佢鬆開捉住我嘅手同時提醒我
明明係出於正常嘅提醒，但我心入面卻有一種「睇下，佢都係關心我」嘅想法，我諗多啲咩呀⋯？唔係就係普通人嘅關心咩⋯？
今日又一次咁，由佢將我平安咁送到番屋企樓下
「你番到啦，咁我走先啦。」卓思齊微微點頭
「嗯，你番去都小心啲⋯」我撐起嘴角
「咁⋯你要唔要鬆一鬆手⋯？」卓思齊講嘅時候目光向下望
我沿住佢嘅視線往下望，我幾時伸手拉住咗佢嘅衫袖？我隨即鬆開手
「你成日都出現得好及時。」我耷低頭一笑，諗起每次我有咩事嘅時候，佢都會咁啱出現
「巧合。」佢聳肩，臉上掛上淡淡嘅笑容
「真係咩？」我衝口而出嘅反問令我自己都覺得意外
「嗯⋯」佢喺沉默過後微微點頭
我抱住想要試探啲嘢嘅心走近佢，佢困惑咁望住我行到佢面前，然後喺冇得到佢嘅批准嘅情況下直接錫佢
喺雨中嘅吻，到底係咩感覺？係擺動不安定係緊張刺激？
佢冇即時將我推開，可能太突然所以有啲反應唔切，我反而⋯有啲享受⋯
佢身上有陣好淡嘅香味，係松木嘅香味？同喺club嘅男人身上嘅味唔同，又濃又嗆嘅古龍水
佢嘅唇染到我嘅唇膏，我抬頭迎上佢嘅目光，佢眸色一沉，我睇唔穿佢諗緊咩
「可能⋯對你嚟講呢種事好平常，對任何人都可以咁做，但我對待所有嘅感情都係認真。」佢下意識後退咗一小步，耳根淡紅，「所以，你既然係唔中意我，就唔好做呢啲會令我誤會嘅行為，我地做個萍水相逢嘅陌生人就夠。」
「你嬲啦？」我知佢冇，只係特登問一句
「咁又⋯未至於⋯」佢嘅眼神有啲閃縮，偷瞄我一眼之後就移開視線
「仲以為你要嬲添～」我行前一步，又將我同佢之間嘅距離拉番近
「你錫我係因為你中意我，定只係知我中意你，單純想玩我？」佢忽然一臉認真咁問我
IG Link: https://www.instagram.com/nd_cotttoncandy/?hl=zh-tw