文迪 J 文集: [聲演系列] 鬼魂上身打真軍 (一)

公司內, 偉俊近排因低沉嘅心情影響到工作, 所以公司個主任 Shirley 就不時捉佢入房度照肺, 今朝早, Shirley 又再將一疊文件用力掟向偉俊度。
 
Shirley :「呀俊哥, 你幾時先肯帶番個人嚟番工呀? 你自己睇吓, 啲數加到錯哂, 公司名又串錯, 中間又漏敢頁, 仲有好多我都唔想再講嘞, 份件我會比呀 Ken 佢執手尾, 而呢封就係你最後嘅 warning letter, 再有下次唔該你就自動辭職執包袱走人呀。」
 
偉俊望吓份件, 跟住就再同 Shirley 講, 「呢份好似係新嚟果個 Fion 做唔關我事喎。」
 
Shirley 再望吓份文件之後, 跟住佢知道係鬧錯咗人, 但個八婆居然又將偉俊啲舊帳番出嚟講。
 
見佢大力拍枱指住偉俊嚟再鬧, 「Fion 做錯又點呀? 你女朋友死果排你啲嘢做到垃圾咁仲唔夠呀, 你條氣唔順嘅可以即刻比封辭職信我, 我同你講而家我見你前便就憎你後便, 我而家無時無刻都想你快啲嗌唔撈就走, 你走咗之後我請個新人番嚟都仲有 so 添呀……」
 


聽到佢又提起自己女友死件事, 偉俊即時火起就同佢發生咗激烈嘅口角, 偉俊掟番封 warning letter 比 Shirley, 跟住佢話會去大老細度 port 佢, 而個八婆就比偉俊激到生蝦咁跳, 跟住偉俊就行番出去再大力關埋度門。
 
一眾同事見偉俊正十號風球都唔敢惹佢, 但偉俊坐番埋位之後就越諗越嬲, 跟住佢就起身索性告半日假出去唞唞, 好過再留響公司一陣可能就會有血案發生都似。
 
呢晚, 偉俊響屋企有啲心煩氣燥, 諗起今朝個八婆又再攞佢女朋友嚟講, 而偉俊就惋惜薇薇點解咁年青就因癌病而去世, 諗起陪佢走埋最後果段日子嘅相對時刻, 偉俊抬頭再望吓果張, 佢同薇薇生前響醫院嘅最後合照, 一陣撕心裂肺嘅感覺突然又再響佢心內湧現住出嚟。
 
眼角已經流住淚水, 薇薇生前所有點滴又再浮現響佢腦海之中, 但響不知不覺間, 偉俊就響梳化度倦極而睡去。
 
叮噹, 叮噹
 


偉俊突然比個門鐘嘈醒咗, 朦朧之間, 佢望吓個鐘已經午夜十二點幾, 偉俊覺得有啲奇怪, 但見咁夜點解仲會有人襟佢門鐘嘅? 定抑或係佢發夢嘅時候聽錯咗呢?
 
叮噹, 叮噹
 
已經確定真係有人襟門鐘, 偉俊跟住就起身行去開門睇吓到底係邊個, 大門一開, 偉俊即時打咗個突, 佢見企響門外嘅係佢公司個仆街主任 Shirley 嚟, 但個八婆點解無端端咁夜又會摸到上嚟佢屋企度嘅?