命中注定我與妳?: 5. 重遇女神姐姐

「唔?家姐妳打排球入左決賽?」慧思好興奮咁問家姐
 
「係呀，星期六打決賽，妳地黎唔黎睇?」
 
「係邊到打先?」
 
「修頓囉，妳叫姑姐帶妳黎?」
 
「家姐比賽，我一定到!!!」
 


係家姐決賽果一日，我地好準時去到球場。為左唔好騷擾到家姐，姑姐同媽咪帶我地坐係觀眾席上邊
 
家姐今日對手，係女拔萃
 
家姐著起套印有11號嘅排球衫，真係好靚架。而且我仲聽到好多佢D同學係到討論佢
 
「詩敏姐真係好靚仔呀….」
 
「佢有冇女朋友呀?」
 


坐係佢地前邊嘅我地，五個人一齊豎起隻耳仔黎野
 
孖女表姐一聽就知人地講咩
 
「大表姐係學校似乎係男神喎」X2
 
「下?家姐鍾意男仔架喎」
 
「但係佢有冇男朋友先?」X2
 


我可以肯定係冇嘅，不過佢好似有心儀男仔，好似咋
 
「男朋友就一定冇，心儀對象都好似冇」估唔到阿哥收風比我更快
 
「點解嘅?」X2
 
「家姐話，佢男朋友一定要好似爸爸咁樣先得」
 
「即係表姐一世做老姑婆?」X2
 
「咁又未必嘅」
 
球賽慢慢進行中
 
家姐真係由細鍾意痴住姑姐，除左佢地兩個個名係一樣之外，就連氣勢都咁似


 
所以家姐係學校嘅綽號係「虎鯊」，而姑姐就係「大白鯊」
 
「In!」
 
「In!」
 
「In!」
 
家姐係F.3果年，已經成為左英華女校排球隊主力，仲要係4號位主攻擊手
 
加上佢好似媽咪嘅樣貌、長腿同埋佢果個少女身材，家姐嘅男fans係絕對唔少
 
以我所知，阿哥間學校係有幾個男仔想追家姐
 


我同慧思坐係到兩個人飲住汽水睇家姐比賽，突然間，我望見後備席之中，有一個有d熟悉嘅背影
 
23號球員，Nataile
 
果個姐姐望住家姐好緊張咁，可能佢又係家姐d Fans啦，但係佢又好熟口面喎
 
係我不停咁望住果個姐姐果時，我都發現，阿哥都望住佢
 
「阿哥你做咩望住23號果個姐姐呀?」
 
「冇…冇呀」佢有d心虛
 
「邊個呀?」慧思伸個頭黎望
 
我指住23號「呢…果個囉」


 
「果個靚女姐姐呀，有少少肥嘟嘟，做咩呀!你鍾意呢d女仔呀!?」
 
「唔係，我發覺佢有少少面善者」
 
「哼!你好呀!」
 
我捉返住發緊脾氣嘅慧思隻手「好啦，妳得意d啦」
 
「算你啦，你女神出場啦」
 
23號姐姐俾人換上場，果時我就聽到媽咪同姑姐傾計
 
「阿嫂，小敏傻左?叫家琪呢個F.1妹係決賽到落場?」
 


家琪?23號姐姐叫家琪?
 
我睇真D，真係佢喎，係舊年係公公診所果個姐姐。原來佢真係聽家姐講，入左英華女校
 
佢比之前瘦左仲靚左，果一刻，家琪姐姐已經變左我女神啦
 
佢扎住一條馬尾咁落場打波，有少少緊張
 
家姐見到咁，就一手打落去家琪姐姐個大屁股到，仲要好響
 
家琪姐姐企係後排位置，佢生得唔高喎，仲係個F.1妹，仲企後排?
 
相信對手都係睇到佢咁嘅身高，所以追住佢黎打，點知….
 
家琪姐姐擋到對方一下扣殺，個波由二傳手升起
 
一球應該由家姐打嘅波，我見到家琪姐姐跳起
 
佢小小嘅身軀，竟然可以黎一個後排攻擊!?
 
當真，佢一殺波，好快咁係對方場區落地
 
我好認得，果一球係家姐負責後排時代嘅扣殺
 
對方俾個F.1妹咁樣得分後都嚇一嚇，部署亂左少少
 
之後家琪姐姐同人調一調位，佢走去6號位，副攻擊手果到再黎一個扣殺
 
又俾佢得到分成功
 
成班女排攬埋一舊依嘩鬼叫，其實點解排球每拎一分，之後成班都要攬住呢?
 
如果男排係咁樣，實俾人打
 
家琪姐姐拎左三分之後，比分版上邊已經係25-16同埋25-18
 
家姐佢地已經領先對手2局
 
英華女校已經手執半隻杯