命中注定我與妳?: 14. 大戰巨鯊幫

我地去到一個課室門口
 
「哦~呢班一定係姑姐果班啦」
 
「你點會知呀?」
 
我指一指班戶門口塊牌叫慧思睇
 
「妳睇F.4D」
 




最緊要，塊牌上仲有張鯊魚旗貼紙係到，話俾大家知道呢一班係訓導主任大白鯊所教嘅班別
 
係門口，我地已經見到家琪姐姐係到佢個樣有D唔開心，莫非阿哥未到?佢尋晚話佢都會黎架喎
 
「家琪姐姐!!!!」慧思好快咁走入去
 
再一次…我地俾班大姐姐包圍住
 
呢班果然係姑姐所教嘅班別，佢地將自己改名為巨鯊幫
 




果然不出我所料，我地一入到去又俾D大姐姐圍住
 
「喂，小朋友，入得黎就要幫襯喎」
 
正當我想黎錢出黎果時，慧思阻止左我
 
「你做咩呀?」
 
「咁…飲野都要俾錢架嘛」
 




「家琪姐姐係到喎」
 
係我地諗緊俾唔俾錢果時，婆婆同媽咪黎到
 
「妳地成班係到圍緊D咩呀?」姑姐係到問佢D學生
 
慧思一聽到姑姐把聲後，就好開心咁走去姑姐同婆婆到
 
「媽咪!!婆婆!!」係果一刻成班姐姐都知道，玩大左
 
正當我想去俾錢果時，我係課室之中發現左阿哥個寶箱
 
係佢係學校用黎呃錢果個箱
 
既然係呢到出現…咁即係家琪姐姐同阿哥….




 
果然不出我所料，第二日阿哥佢突然間話去迪士尼玩，仲執左風扇仔之類
 
要知道男仔通常執咁多野去街，肯定係約左女仔
 
所以我果晚就係到等阿哥返黎
 
佢都算玩得夜囉，差唔多11點先返到
 
係佢沖完涼後我立即入廁所係佢除落黎嘅衫上邊，我搵到一樣野
 
係佢D衫上邊，有幾條咖啡色嘅頭髮，仲要係長頭髮
 
Fiona姐姐係黑色頭髮，而天生咖啡色長頭髮嘅女仔，我只係諗到一個人
 




家琪姐姐
 
如果我冇估錯，阿哥頭先係同家琪姐姐兩個人去左迪士尼玩
 
好甜蜜喎
 
係家琪姐姐嘅頭髮上，我見到商機，所以我搵個袋入起D頭髮
 
係阿哥同姐姐去完迪士尼之後果個星期開始，阿哥星期三同五就話約左同學去溫書，仲要好夜先返
 
我同家姐都覺得，佢邊會咁順攤同男仔去溫書，佢一定係約左女仔
 
所以每一次阿哥返屋企果時，我都會去搵佢套校服
 
每一次，我都搵到幾條咖啡色頭髮，而根據家姐係F.4果級嘅線眼，家琪姐姐的確係每個星期三同五都會離開學校去自修室溫書，有時會拎住TIME週刊係英華出現




 
同時間，爸爸訂果D TIME週刊一到阿哥手上就好快消失左
 
所有間接證據表示，阿哥同家琪姐姐係拍緊拖或者就快拍拖
 
直到某一日，阿哥拎左盒野返黎。我有理由相信佢係用黎送俾家琪姐姐
 
係果排，阿哥好開心咁返屋企，佢沖完涼後仲要好開心咁係屋企玩電話同埋傾電話
 
佢傾果時仲要關埋門
 
幾時鑿佢一筆好呢?得拎住袋頭髮係到諗下諗下，諗到慧思同家姐入黎我房
 
「浩翹你拎住個袋仔諗乜野呀?」家姐入黎問我
 




我遞個袋俾家姐睇
 
「你甩頭髮呀?」
 
「唔係啦家姐，妳睇清楚D」
 
「咩呀….喂….D頭髮咁長嘅仲要係啡色嘅，你溝緊女呀?」
 
慧思聽到家姐咁講，佢又好不滿咁望住我
 
「家姐呀，呢D頭髮，我係阿哥身上搵到架」
 
「浩揚?佢追緊女仔咩?」
 
「如果我冇估錯就應該係啦」
 
家姐拎住袋頭髮係到睇，再喃喃自語
 
「長頭髮…啡色…呢隻仲要係天然啡喎」
 
「家姐妳諗唔諗到係邊個?」
 
家姐用力諗一諗，佢真係諗左一諗咋，就立即講到答案出黎
 
「家琪!!!我識嘅女仔之中，只有佢嘅頭髮係咁嘅顏色」
 
我指住家姐「ex7actly」
 
「浩揚哥哥同家琪姐姐拍緊拖呀?」估唔到慧思比我地更興奮
 
就係果日，我成功令阿哥向我進貢500蚊
 
阿哥同家琪姐姐曝光啦，佢地係sogo揀衫果時俾媽咪撞到正
 
算啦，都係費事屈佢咁多錢
 
由果日開始，家琪姐姐經常黎我地屋企食飯