命中注定我與妳?: 24. 身份曝光

「媽….媽咪?你叫Miss Lam做媽咪?」Winnie口震震咁問我
 
「係呀，妳地班主任，係我媽咪，訓導主任係我姑姐」
 
「咁校長…」
 
「我叫佢婆婆」
 
Winnie聽到我咁講，好快想將我手上工作拎返，不過媽咪見狀…
 




「嘉怡，我叫佢黎幫妳地手，有咩事都可以叫我細仔做」
 
「但係Miss Lam…」
 
「唔怕啦，佢阿哥早幾年都係咁樣幫Miss Cheung果班手。浩翹，你就留係到幫媽咪d學生啦」
 
「知道」
 
媽咪講完後行開左，姑姐行到我身邊
 




「點呀姑姐，有咩幫到妳?」
 
「冇，睇下你會唔會好似阿哥咁，係呢到搵到個…」佢附帶好奸嘅眼神
 
「得啦得啦，冇野啦，妳快d游走啦」
 
「乖乖地，唔好做色狼呀」
 
「知啦知啦」
 




當姑姐離開之後，我望住Winnie「有咩可以幫到妳地呀?」
 
「你…真係幫我地?」
 
「呵，我應承得媽咪，就一定會幫」
 
於是，我係到幫佢地整開放日嘅野，做得耐，大家都坐低休息下
 
「係呢，頭先聽Miss Cheung講，話你哥哥都有幫過我地d師姐手?」
 
我又諗起家琪姐姐
 
「當然啦，佢起初唔肯架，點知愈幫愈多」
 
「佢咁好人嘅?」




 
「仲識到佢女朋友添」
 
「咩話?你話….你阿哥同我地學校d女仔拍拖?」
 
「係呀，好奇咩?妳都一定見過佢女朋友架」
 
「真係?佢好出名?」
 
「當然啦」
 
「佢叫咩名?我要諗下識唔識喎」
 
「余家琪，Natalie」
 




Winnie聽到家琪姐姐個名之後，顯得不能相信
 
「家琪姐?佢係校花黎架喎!仲成績好好」
 
「係佢囉，美姐個女丫嘛，而家係HKU 讀MBBS」
 
「咁你哥哥呢?」
 
「佢同姐姐一齊讀醫囉」
 
「家琪姐佢點呀?」
 
「而家佢星期一至五都會係我地屋企住呀」
 
「我都好耐冇見佢lu」




 
「我又諗起，當年阿哥又係俾媽咪捉黎英華，佢先識到家琪姐姐」
 
「咁佢係咪好幸運呀?識到我地個校花」
 
「咩呀，初時佢唔想黎架，但係有得見家姐d同學，佢先肯黎」
 
我地休息左一陣，就繼續開工
 
嘉怡係到同我一齊設計遊戲
 
「妳地打算整個有獎問答遊戲?」
 
「係呀，有冇好嘅問題提供?」
 




我諗下先….諗呀諗，就反問嘉怡
 
「全校最恐怖嘅老師係邊個?」
 
「邊個呀?唔…..應該係…」嘉怡有少少唔好意思咁，所以我就代佢答
 
「大白鯊」
 
之後我地望住對方一齊笑
 
「好…第二條，全校最鍾意食零食果位老師係邊位?」
 
嘉怡諗一諗
 
「大白鯊」
 
「冇錯!」之後我地又係不停大笑
 
「好好好…邊個老師係全校最好人最溫柔?」
 
「一定係Miss Lam!」嘉怡一口咬定
 
我就用一個驚恐眼神回返俾佢