命中注定我與妳?: 26. 遇上另一個女仔

返到屋企打開左社交網站，發現有人sent friend request俾我
 
我撳入去睇下，原來係Winnie
 
好啦，我就accept妳啦
 
然後我再睇下佢d相
 
佢同慧思相比，更加靚女。而且係相中都見佢笑得好開心好燦爛
 




嘉怡佢有好多相都係拎住中樂器，佢仲識拉小提琴
 
仲有佢好多游水比賽嘅相，呢個女仔又幾有陽光氣息
 
某日食午飯時間，我依舊同幾個同學一齊食
 
食好飯有人屎忽痕，話想去行下百佳
 
就係咁，我地幾個男嘅就去左百佳睇野
 




「點解我地要好似師奶咁黎百佳行?」
 
「食完飯當做下運動囉」
 
「你荒返到去冇運動做嘅」
 
果d唔單止係運動，可以稱之為摔角
 
我地行到去賣零食個位，見到有個真光妹，佢拎唔到佢想要果包百力枝
 




於是我地就行埋去
 
「有咩幫到妳?」
 
佢好有禮貌咁同我地講「我拎唔到果盒百力枝」
 
於是我就伸手拎俾佢
 
「唔該哂你」
 
「下次妳一個女仔就唔好跳到咁高啦」
 
「係…」
 
好啦，有型完，夠鐘去上堂啦




 
「擦」大家打開課本，好用心咁上堂
 
上緊堂嘅我地，同埋落左堂嘅我地，完全係兩個人
 
唔係上堂果時，我地可以玩到炸左間學校，但係一正式上堂大家就會好靜好靜
 
放學後，我自己一個孭住書包返屋企
 
近年慧思已經少左同我一齊返屋企，始終佢自己都有野要忙
 
我返到去通常立即溫書做功課
 
每晚食完飯，慧思佢返左落32樓後，我就會開電腦
 




係今晚，有人係網上Hi我
 
「喂喂」
 
「點呀?」
 
「你又知我係邊個?」
 
「妳咪Winnie囉」
 
「咁你都知嘅?」
 
「妳個email出賣左妳啦，有咩貴幹呀?」
 
「咩喎想同你交換下D卷之嘛」




 
「哈哈哈哈!!!妳地D卷同notes我早就有啦」
 
睇黎呢個女仔都幾大矇，傻傻下之餘又帶點可愛
 
「咁你想我搵咩同你交換?」
 
「介紹女同學俾我識?」
 
「嘩!!你想識我地嘅話，咪問Miss Lam咪得囉」
 
「車!!冇d誠意架!!!」
 
我成晚都係到同嘉怡係電腦上玩，仲玩到好夜我先肯去瞓
 




第二日起身，我執好d notes，係食lunch時間拎去影印
 
放低notes係影印鋪再去join埋同學食飯
 
「喂翹哥，你拎d notes去影印做咩呀?」
 
「哦，媽咪個學生想要我地d notes，我咪影印俾佢囉」
 
「女呀?」佢地成班雙眼發光
 
「咁…我媽咪教英華女校，佢d學生當然係女仔啦」
 
「介紹俾我地識丫」
 
「唔得」
 
「定係介紹d真光妹俾我地識呀」
 
「更加唔得」
 
「你獨食難肥呀」
 
「咁咪更好囉」
 
「喂呀…一係介紹你個契妹俾我地識啦」
 
「慧思?唔可以!!!!」我果下反應係超快
 
「咦!!!!有D野喎!!!!」
 
「冇…冇呀!!!你地想我俾姑姐鬧死呀?」
 
「通常D契哥契妹都係…」
 
我地呢個話題由餐廳講到去影印鋪，然後我地玩得好開心果時，撞到個真光女仔
 
仲差D將佢撞落地下
 
好彩我一手捉實佢，佢先未致跌落地下
 
我認得，係上次百佳果個女仔